Investitsiyalar, sanoat va savdo vaziri Laziz Qudratov Turkiyaning Albayrak Holding kompaniyasi koordinatori Erdal Nalbant bilan uchrashuv o‘tkazdi. Bu haqda ISSV matbuot xizmati xabar berdi.
Qayd etilishicha, tomonlar raqamlashtirish, infratuzilma obyektlarini qurish va mashinasozlik sohalarida yangi loyihalarni amalga oshirishni nazarda tutgan holda ikki tomonlama munosabatlarni faollashtirish va hamkorlikni yanada rivojlantirish istiqbollarini ko‘rib chiqqan.
Uchrashuvda Turkiya investitsiyaviy va sanoat doiralari uchun Markaziy Osiyo mintaqasida sarmoya kiritishning qulay yo‘nalishini tanlash va o‘zaro manfaatli loyihalarni amalga oshirishda o‘ziga xos mayoq bo‘lgan kompaniyaning mamlakatimizdagi muvaffaqiyatli faoliyati ta’kidlangan.
Xususan, O‘zbekiston shaharlarida “Yo‘l harakati qoidabuzarliklarini aniqlashning avtomatlashtirilgan foto va video qurilmalarini o‘rnatish” loyihasi doirasida amalga oshirilayotgan ishlarning borishi ko‘rib chiqilgan. Tomonlar tizimni o‘z vaqtida ishga tushirish bo‘yicha samarali choralar ko‘rish zarurligini qayd etgan.
Albayrak Holding 1952-yilda tashkil topgan. Uning tarkibiga 127 ta kompaniya kiradi va xodimlar soni 15 ming kishidan oshadi. Xolding qishloq xo‘jaligi, chiqindilarni qayta ishlash, qog‘oz mahsulotlarini ishlab chiqarish, transport va logistika, mashinasozlik, infratuzilmaviy rivojlanish va boshqa sohalarda loyihalarni amalga oshiradi.
Eslatib o‘tamiz, 2020-yil dekabr oyida “Davlat tomonidan tartibga solinadigan sohalarga xususiy sektorni jalb etish bo‘yicha qo‘shimcha chora-tadbirlar to‘g‘risida”gi prezident qarori qabul qilingandi. Qarorga ko‘ra, maxsus avtomatlashtirilgan foto va video qayd etish dasturiy texnik vositalari o‘rnatiladigan joylarni tadbirkorlarga biriktirish elektron auksion savdolari orqali amalga oshiriladi.
Izoh (1)
йулларни ухшатсин