“Atrof-muhitni, aholi salomatligini zararli shovqinlar va yoqimsiz hidlar taʼsiridan muhofaza qilish sohasini tubdan takomillashtirish yuzasidan kompleks chora-tadbirlari to‘g‘risida”gi prezident farmoni loyihasi ishlab chiqildi. Bu haqda Adliya vazirligi matbuot xizmati xabar berdi.
Qayd etilishicha, amaldagi sanitariya qoidalari va meʼyorlarida ayrim shovqinlarga oid normalar belgilangan. Biroq yorug‘lik shovqinlari va hidlar bo‘yicha sanitariya qoidalari va meʼyorlari mavjud emas. Masalan, sanitariya qoidalari va meʼyorlarida elektron displeyli (LED, OLED, 3D) tashqi reklama obyektlarining yorug‘lik meʼyorlari belgilanmagan hamda undagi yorqin ranglarning inson sog‘ligiga salbiy taʼsiri, namoyish etish davriyligi bo‘yicha normativlar keltirilmagan.
“Davlat organlarining zararli shovqinlar va yoqimsiz hidlarga qarshi kurashish va ularni oldini olish sohasidagi vazifalarining aniq chegaralari belgilanmagani mazkur sohani tartibga solishda qiyinchilik tug‘dirmoqda”, — deyiladi xabarda.
Yuqorida nazarda tutilgan muammolarni bartaraf etish maqsadida ishlab chiqilgan loyihada quyidagilarni amalga oshirish nazarda tutilmoqda:
- Zararli shovqinlar va yoqimsiz hidlarni atrof-muhitga va aholi salomatligiga bevosita zarar yetkazuvchi zararli manbalar deb eʼtirof etish;
- “Tungi vaqt”ni – soat 23:00 dan soat 06:00 ga qadar bo‘lgan vaqt, “shovqinsiz davr”ni – ish kunlarida soat 23:00 dan soat 07:00 ga qadar hamda dam olish va bayram kunlarida soat 21:00 dan soat 08:00 qadar bo‘lgan vaqt etib belgilash.
2024-yil 1-yanvardan boshlab tungi vaqt va shovqinsiz davr mobaynida quyidagilarni taqiqlash belgilanmoqda:
- turar joylarda va aholi punktlarida tashqi va ichki manbalardan ruxsat etilgan shovqin darajasidan ortiq shovqinlarni hosil qilish, shuningdek, ruxsat etilgan shovqin darajasiga muvofiq, lekin aholiga sezilarli notinchlik tug‘diruvchi doimiy bo‘lgan yoki doimiy bo‘lmagan shovqinlarni chiqarish;
- aholi punktlarida va joylashtirish vositalarida daraxt kesuvchi, maysa va o‘tlarni o‘ruvchi, avtomototransport vositalari hamda boshka jismlarni avtomatik ravishda yuvuvchi elektr va benzin dvigatellar yordamida ishlaydigan moslamalardan foydalanish;
- aholi punktlarida avtomototransport vositalari, shu jumladan, tezkor va maxsus xizmatlarning ko‘k yoki qizil yoxud ko‘k va qizil rangli yalt-yalt etuvchi mayoqchalar yoqilgan transport vositalari tomonidan tovush chiqarish moslamalaridan foydalanish;
- aholi punktlarida ochiq osmon ostida ko‘ngilochar-tomosha tadbirlarini (musiqiy, konsert, sport, reklama va boshqalar) o‘tkazish;
- yakka tartibdagi uy-joy va ko‘p kvartirali uylarda qurilish va taʼmirlash ishlarini amalga oshirish, bundan avariya holatlarini bartaraf etish hollari mustasno (elektr, gaz, issiqlik hamda ichimlik suvi taʼminoti bilan bog‘liq, shuningdek, fuqarolarning hayoti, sog‘lig‘i yoki mulkiga xavf-xatar tug‘dirishi mumkin bo‘lgan boshqa favqulodda holatlar).
Shuningdek hujjat bilan quyidagilar belgilanmoqda:
- “Zararli shovqinlar va yoqimsiz hidlar yagona geoaxborot portali” tizimini yaratish hamda masʼul xodimlarni tizimdan foydalanish bo‘yicha o‘qitish;
- hidlar va yorug‘lik shovqinlari bo‘yicha sanitariya normalari va qoidalarini ishlab chiqish va tasdiqlash;
- atmosfera havosini ifloslanishini oldini olish maqsadida bino va inshootlarni qurish, taʼmirlash va buzish ishlarida changning chiqishi va atrof-muhitga tarqalishini oldini olish imkonini beradigan zamonaviy suvni purkaydigan (mikroklimat) texnologiyalarini joriy etish choralarini ko‘rish.
2022-yil yanvarda Adliya vazirligi O‘zbekiston yo‘llarida shovqin balandligini o‘lchovchi radarlar paydo bo‘lishi mumkinligi haqida xabar bergandi. O‘shanda vazirlik tomonidan amalga oshirilgan o‘rganishlar natijasida inson salomatligiga salbiy ta’sir ko‘rsatuvchi omillardan bo‘lgan shovqinga qarshi kurashni takomillashtirish bo‘yicha taklif va tavsiyalar ishlab chiqilgan edi.
Izoh (0)