Iqtisodiy hamkorlik tashkilotining (IHT) tarixi va bu tashkilotda O‘zbekiston manfaatlari qay darajada ekanligi xususida O‘zbekistonning Erondagi elchisi, IHT doimiy vakili Bahodir Abdullayev o‘z mulohazalarini bildirib o‘tdi.
“Iqtisodiy hamkorlik tashkiloti uchta mamlakat: Turkiya, Eron Islom Respublikasi va Pokiston tashabbusi bilan 1985-yilda tashkil etilgan. Tashkilotga 1992-yilda Markaziy Osiyoning 5 ta mamlakati, jumladan, O‘zbekiston ham aʼzo bo‘lib kirgan. Shu bilan bir qatorda Afg‘oniston va Ozarbayjon ham qo‘shilgan. Ayni kunda mintaqaviy iqtisodiy tashkilotga 10 ta davlat aʼzo.
Ko‘p yillar davomida ushbu tashkilot faoliyati ancha sust kechdi, ammo oxirgi yillarda o‘zaro hamkorlik qaytadan yana jonlanayotganini kuzatishimiz mumkin. Ayniqsa, 2017-yildan keyin O‘zbekistonning ushbu tashkilot doirasida faollashuvi, tashkilot ekspertlarining bildirgan fikrlariga ko‘ra ham, tashkilotning yanada yuksalishiga sabab bo‘ldi. Jumladan, 2021-yilning noyabr oyida Ashxobod shahrida bo‘lib o‘tgan sammitda muhtaram prezidentimiz tomonidan 8 ta amaliy tashabbus ilgari surildi. Bu tashabbuslar — o‘zaro savdo bitimini imzolash, yuqori martabali ekspertlar platformasini tashkil etish va, eng muhimi, har bir yilni maʼlum bir shior ostida o‘tkazish bo‘ldi.
2022-yilda O‘zbekiston bevosita ushbu tashkilotga raislik qildi va “Iqtisodiy hamkorlik va o‘zaro bog‘liqlikni yanada mustahkamlash” shiori ostida o‘tgan edi”, — dedi Bahodir Abdullayev.
Elchining alohida taʼkidlashicha, Iqtisodiy hamkorlik tashkiloti ko‘p qirrali platforma.
“Bunda tashkilotning funksional vazifalari bor va bulardan eng asosiysi — savdo-iqtisodiy, transport-tranzit, turizm, ekologiya muammolari hamda inson resurslari yo‘nalishlariga qaratilgan.
Shundan kelib chiqqan holda, O‘zbekistonga tashkilotning qanday foydasi bor, degan savolga shunday javob berish mumkinki, avvalambor, tashkilotga aʼzo mamlakatlar O‘zbekistonning yaqin qo‘shnilari bilan ko‘p tomonloma diplomatiya platformasidan foydalangan holda O‘zbekiston savdo, transport o‘ynalishida o‘zining tashabbuslarini ilgari surishi va shu orqali o‘zining iqtisodiy manfaatlarini taʼminlashga erishishi mumkin. Bu yo‘lda amaliy qadamlar tashlanmoqda, deb bemalol aytish mumkin va ertaga o‘tadigan sammit tashkilot tarixida juda muhim voqea bo‘lib xizmat qiladi”, — dedi Iqtisodiy hamkorlik tashkilotining doimiy vakili.
Prezident Shavkat Mirziyoyev raisligida o‘tadigan IHT samitida ishtirok etish uchun bunga qadar Qozog‘iston bosh vaziri Alixan Smailov va Pokiston muvaqqat hukumati rahbari Anvar ul-Haq Kakar Toshkentga yetib kelgan.
Iqtisodiy hamkorlik tashkiloti sammitida, shuningdek, Ozarbayjon prezidenti Ilhom Aliyev, Eron prezidenti Ibrohim Raisiy, Tojikiston prezidenti Emomali Rahmon, Turkmaniston prezidenti Serdar Berdimuhamedov, Qirg‘iziston prezidenti Sadir Japarov, Turkiya prezidenti Rajab Toyyib Erdo‘g‘on hamda IHT bosh kotibi Xusrav Noziriy ishtirok etadi.
Kun tartibiga muvofiq, IHT doirasida savdo-iqtisodiy, investisiyaviy, transport-kommunikatsiyaviy va gumanitar hamkorlikni yanada kengaytirish hamda ushbu ko‘p tomonlama tuzilma faoliyatini takomillashtirish masalalari ko‘rib chiqiladi.
Izoh (0)