Райҳон Ғаниева қиз фарзанд кўриш орзуси, қовурғасини олдиргани ҳақидаги миш-мишлар ва муваффақиятсиз бизнеслари ҳақида

Ўзбекистонда хизмат кўрсатган артист Райҳон Ғаниева “Шок.уз” YouTube каналига берган интервьюсида мухлисларини қизиқтирган кўплаб саволларга жавоб берди. Қуйида хонанданинг айрим саволларга жавоблари келтирилади. 

— Интервьюларингиздан бирида қиз фарзанд кўришни орзу қилишингиз ҳақида гапиргансиз. Жараён қандай кетмоқда?

— Бугун ҳам турмуш ўртоғимга чақалоқ хоҳлашим ҳақида гапирдим. Улар эса фарзанд кўриш ёшидан ўтганимизни айтдилар, — дейди хонанда.

— Бошқа фарзанд кўришни режалаштирмаяпмиз. Менда уч нафар, Райҳонда эса иккита умумий беш фарзандимиз бор. Мен фарзанд тарбиялашни жуда мураккаб ва қийин жараён деб биламан. Шу беш фарзандимизни катта қилиб олсак ҳам катта гап. Ёзда Ислом ва Имрон лагерга боришди. Исломни ўша ерда бир бола хафа қилиб қўйибди. Мен ўғлимга бу ҳақда айтдим ва у лагер ичкарисига кириб, ўша бола билан гаплашиб чиқди. Умуман олганда фарзандларимиз бир-бири билан аҳил ва иноқ”, — дейди Райҳоннинг турмуш ўртоғи Фарҳод Алимов.

— Сизни хипчабел бўлиш учун қовурғасини олдириб ташлаган дейишади. Бу қанчалик тўғри?

—Хипчабел бўлиш учун қовурғасини олдириб ташлаш мумкинлиги ҳақида ҳозир сиздан эшитяпман. Шунақа қилса бўлармикан? Қовурға олинганидан сўнг инсон қандай яшайди? Мен ҳеч қачон бундай қилмаганман. Онам раҳматли худди шунақа хипчабел ва сарвқомат эдилар. Мен уларга тортганман.

— Нима учун шоу-бизнесда дугонангиз йўқ?

— Шоу-бизнесда дугонам бор. У — таниқли хонанда Согдиана. Ўзбек шоу-бизнеси вакилларининг ҳаммаси билан яхши муносабатдаман, лекин яқин эмасман. Фақат икки ҳамкасбим билан гаплашмайман, холос. Танишларим кечки овқатларга таклиф қилишади, лекин бормайман. Бўш вақтимни фарзандларим билан ўтказишни хоҳлайман.

— Ферма бизнеси билан шуғулланаётганингиз ҳақида мухлисларингизга сўзлаб бергандингиз. Бизнес қандай кетяпти?

—  Ферма очиб, ўрдак боқишни йўлга қўйгандик. Бизнесимиз ўхшамади. Қийин иш экан. Тадбиркорлар фақат 2 кило ва ундан оғир ўрдакларни харид қиларкан. Биз эса ўрдакка фақат табиий нарса бериб боқдик. Табиий егулик еган ўрдаклар эса 2 кило вазн тўплаши қийин бўларкан. Тўплаган пайти эса жуда қариб кетибди, дейишди. Бу бизнесни аслида бир дўстимиз таклиф қилганди. Қилайлик, зўр бўлади, деганди. Лекин бўлмади. Кейин дарахт ҳам экиб кўрдик. У ҳам ўхшамади. Шуни англадимки, мендан бизнесмен чиқмас экан.