Xorazm viloyati bojxona boshqarmasi va viloyat Davlat xavfsizlik xizmati xodimlari bilan hamkorlikda qadimiy tangalarning mamlakat hududidan noqonuniy olib chiqib ketilishiga chek qo‘yildi. Bu haqda viloyat bojxona boshqarmasi matbuot xizmati xabar berdi.
Qayd etilishicha, Urganch xalqaro aeroportidan Urganch—Istambul reysi orqali uchib ketayotgan chet el fuqarosi R.V. gumon qilinib, unga tegishli bo‘lgan shaxsiy buyumlar solingan qo‘l sumkasi tekshiruvdan o‘tkazilgan. Tekshiruv davomida og‘zaki so‘rov paytida aytilmagan, O‘zbekistondan olib chiqish taʼqiqlangan 50 dona (1898, 1903, 1908, 1911, 1914, 1916, 1961, 1962, 1963-yillarda) va temuriylar davri tangalari bo‘lgan, taxminan XV asrlarda Buxoro va Samarqandda zarb etilgan misdan yasalgan qadimiy tangalarni olib ketayotgani aniqlangan.
Mazkur holat yuzasidan bojxona xodimlari tomonidan maʼmuriy huquqbuzarlik to‘g‘risidagi bayonnoma rasmiylashtirilib, Jinoyat ishlari bo‘yicha Urganch shahar sudining qaroriga asosan davlat egaligiga o‘tkazilgan. Hozirda ushbu qadimiy tangalar “Xiva Ichan-qalʼa” davlat muzey qo‘riqxonaga topshirilgan.
“Madaniy boyliklarning olib chiqilishi va olib kirilishi to‘g‘risida”gi qonun hamda Vazirlar Mahkamasining “Madaniy boyliklarni olib chiqilishi va olib kirilishi to‘g‘risida”gi nizomi talablariga muvofiq 50 yil muqaddam va undan ham oldin yaratilgan madaniy boyliklarni O‘zbekiston hududidan olib chiqish mumkin emas.
Bundan oldin Buxoro xalqaro aeroportida qadimiy tangalarni olib chiqmoqchi bo‘lgan erkak to‘xtatib qolingani, Samarqandda Kushonlar davriga oid tangalarni chetga olib chiqib ketmoqchi bo‘lgan fuqaro aniqlangani to‘g‘risida xabar berilgandi.
Izoh (0)