Toshkent shahri Chilonzor tumanida fuqaroga muqaddam asl oltin tangani noqonuniy o‘tkazib, keyin ularning nusxalarini sotmoqchi bo‘lgan firibgar ushlandi. Bu haqda Bosh prokuratura matbuot xizmati xabar berdi.
Ma’lum qilinishicha, Bosh prokuratura huzuridagi departament hamda DXXning Chilonzor tumani bo‘limlari tomonidan tezkor tadbir o‘tkazilgan. Tadbirda fuqaro G.M. fuqaro N. va M.ning ishonchiga kirib, ularga rangli metall ko‘rinishidagi 4 dona tangani go‘yoki 1899-yilda Rossiya imperiyasida ishlab chiqarilgan haqiqiy qadimiy tanga sifatida baholab, 56,9 million so‘mga sotgan vaqtida ashyoviy dalil bilan ushlangan.
Shuningdek, G.M. muqaddam N.ga 1 dona rangli metall tangani qadimiy tanga sifatida baholab 14,1 million so‘mga sotganligi aniqlangan.
Ekspertiza xulosasiga ko‘ra, 5 dona tanganing 1 tasi 1899-yilda Rossiya imperiyasida ishlab chiqarilgan haqiqiy oltin tanga ekanligini, qolganlari uning nusxasi ekanligi qayd etilgan.
Mazkur holat yuzasidan Jinoyat kodeksining tegishli moddalari bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq Toshkentda qiymati 16,8 milliard so‘mdan ortiq bo‘lgan olmos, zumrad va Kushon davlatida zarb qilingan tilla tangani sotayotgan shaxslar qo‘lga olingani to‘g‘risida xabar berilgandi.
Izoh (0)