Germaniya prezidenti Tanzaniya mustamlaka qilingani uchun uzr so‘radi

Germaniya prezidenti mustamlakachilik davrida Tanzaniyada sodir etilgan qirg‘inlar uchun kechirim so‘radi. Bu haqda Deutsche Welle xabar berdi.

Germaniya prezidenti Frank-Valter Shtaynmayer 1-noyabr kuni 1905—1907-yillardagi Maji-Maji qo‘zg‘oloni qurbonlari avlodlari bilan uchrashuvda o‘z mamlakatining mustamlakachi kuchlari tomonidan Tanzaniyada sodir etilgan qonunbuzarliklar uchun kechirim so‘radi.

“Germaniya mustamlakachiligi qurbonlari oldida ta’zim qilaman. Germaniya prezidenti sifatida kechirim so‘rayman. Nemis mustamlakachi askarlari ota-bobolaringizga qilgan ishlaridan uyalaman”, — dedi Shtaynmayer.

Shuningdek, u 66 nafar jangchisi bilan birga nemislar tomonidan osib o‘ldirilgan va boshi tanasidan judo qilingan o‘sha paytdagi qo‘zg‘olon rahbari Songea Mbanoning taqdiri haqida gapirdi.

Germaniya mustamlaka imperiyasi Afrikaning bir qancha mamlakatlarida, jumladan, Burundi, Ruanda, Tanzaniya, Namibiya va Kamerunda tarqaldi. Birinchi jahon urushidan keyin u o‘z mavjudligini to‘xtatdi.

Tarixchilarning hisob-kitoblariga ko‘ra, 1905—1907-yillarda nemis mustamlakachi qo‘shinlari 200 dan 300 minggacha qo‘zg‘olon vakilini o‘ldirgan.