Belgiya qiroli Filipp Kongo prezidenti Feliks Chisekediga mamlakat mustaqillikka erishganiga 60 yil to‘lishi munosabati bilan tabrik maktubini yo‘lladi. Monarx o‘z maktubida Belgiya mustamlakachiligi vaqtida Kongoda amalga oshirilgan zo‘ravonlik va shafqatsizliklarni qoralagan. Maktub qirollik oilasining saytida e’lon qilindi.
“Bugungi kunda ham azob-uqubatlari davom etayotgan o‘tmishdagi yaralar uchun chuqur qayg‘uda ekanligimni bildirmoqchiman, chunki jamiyatimizda hamon tahqirlashlar davom etmoqda”, — deb yozadi monarx.
Shuningdek, u Leopold II davrida Belgiya mustamlakasiga aylangan Kongo xalqi uzoq yillar davomida boshidan o‘tkazgan kamsitish va azoblar uchun kechirim so‘ragan.
“Kelajakdagi aloqalarimizni mustahkamlash va samarali hamkorligimizni rivojlantirish uchun bir-birimizga umumiy o‘tmishimiz haqida samimiy va to‘g‘ridan to‘g‘ri gapira olishimiz kerak”, — deyiladi qirol maktubida.
Qirol Filipp Leopold II ning to‘g‘ridan to‘g‘ri avlodi hisoblanadi. La Libre Belgique’ning yozishicha, u ushbu masalada afsusda ekanligini bildirgan birinchi monarxga aylangan.
Zamonaviy belgiyaliklar qirol Leopold II ni Kongo aholisiga nisbatan shafqatsiz munosabatda bo‘lganlikda ayblaydi. Bu mahalliy aholi genotsidi va o‘limiga olib kelgan. Turli hisob-kitoblarga ko‘ra, Leopold II davrida mamlakatda bir milliondan 15 millionga yaqin kongolik halok bo‘lgan.
Mavzuga doir: Belgiya shahzodasi Ispaniyada koronavirus yuqtirib oldi
Izoh (0)