Geni modifikatsiya qilingan cho‘chqa yuragi ko‘chirib o‘tkazilgan amerikalik Lourens Fosett eksperimental transplantatsiya operatsiyasidan olti hafta o‘tib vafot etdi. U 58 yoshda edi, deb xabar berdi UPI.
Yurak kasalligi va boshqa avvaldan mavjud kasalliklar tufayli erkak transplantatsiya uchun inson yuragini qabul qila olmagandi.
Cho‘chqa yuragini ko‘chirib o‘tkazish bo‘yicha eksperimental operatsiya Merilend universiteti tibbiyot markazida o‘tkazilgan. Transplantatsiyadan bir oy o‘tgach, shifokorlar erkakning ahvoli yaxshi ekani, sezilarli rivojlanish belgilarini ko‘rsatganini, u oilasi bilan vaqt o‘tkazib, fizioterapiya kurslarini o‘tayotgani haqida aytishdi.
Shifokorlar uning yuragi a’lo darajada ishlayotganini, organ ishlashini ta’minlash uchun odatda qo‘llanadigan dori-darmonlarni berish to‘xtatilganini ma’lum qildi. Dastlab shifokorlar infeksiya yoki organizmning yurakni rad etish belgilarini topmagan. Biroq Fosettning o‘limidan avvalgi kunlar bunday belgilar yuzaga chiqishni boshlagan.
Shifokorlarning ta’kidlashicha, a’zolarni rad etish an’anaviy inson a’zolari transplantatsiyasidagi eng jiddiy muammo, hayvonlardan odamga transplantatsiya qilishda bu yanada muhim.
Fosett AQSHda cho‘chqa yuragi bilan yashagan ikkinchi bemor bo‘ldi.
Izoh (0)