Nyu-York universitetida bir guruh jarrohlar tadqiqot doirasida genetik modifikatsiyalangan cho‘chqa yuragini miyasi o‘lgan odamga ko‘chirib o‘tkazdi, deb yozadi “Gazeta.ru”.
NYU Langone Health nashri yozishicha, ushbu jarayon bunday turdagi birinchisi bo‘lib, hayvonlar organlarini modifikatsiya qilib, ularni transplantatsiyaga muhtoj odamlarda qo‘llash imkoniyatlarini baholashga urinish yo‘lida olg‘a qadam bo‘ldi.
Organ o‘rnatilgan 72 yoshli bemor Lourens Kellining miyasi o‘lgan. Uning oilasi jasadni cho‘chqaning modifikatsiyalangan yuragi vafot etgan odamning tanasida qanchalik darajada ishlashini aniqlashga qaratilgan tadqiqot uchun berishga rozi bo‘lgan.
Iyun oyida Kelliga transplantatsiya amalga oshirilgach, iyulda tadqiqotchilar guruhi bu jarayonni yana bir vafot etgan shaxs — 64 yoshli Alva Kapuano ustida ham takrorladi.
Nyu-York universiteti Langoun transplantatsiya instituti direktori doktor Robert Montgomeri aytishicha, jarayonlar qabul qiluvchi tanalar cho‘chqa yuragini qanchalik darajada qabul qilganini yanada chuqurroq o‘rganish imkonini bergan.
“Biz yanada ko‘proq monitoring o‘tkazib, bilogiyani yaxshilab tushunib olishimiz va bizga noma’lum bo‘lgan narsalarni aniqlashimiz mumkin”, — dedi mutaxassis.
Uning qo‘shimcha qilishicha, ularning tadqiqoti noyob bo‘lgan, chunki ular tajriba uskunalari va dorilardan foydalanmasdan, oddiy sharoitlarni yaratishga uringan.
Eslatib o‘tamiz, yanvar oyida amerikalik shifokorlar birinchi marta 57 yoshli Devid Bennetga genetik jihatdan o‘zgartirilgan cho‘chqaning yuragini muvaffaqiyatli transplantatsiya qilgan edi. Ammo u mart oyida vafot etdi.
Izoh (0)