Amerikalik shifokorlar genetik jihatdan o‘zgartirilgan cho‘chqa yuragini odamga ko‘chirib o‘tkazish bo‘yicha ikkinchi operatsiyani muvaffaqiyatli amalga oshirdi. Avvalgi bemor shunday transplantatsiya bilan ikki oy yashagan, deb xabar bermoqda DW.
Operatsiya Merilend universiteti tibbiyot markazida bo‘lib o‘tdi. Universitet veb-saytida e’lon qilingan bayonotga ko‘ra, operatsiyadan so‘ng bemor, 58 yoshli AQSH dengiz floti faxriysi Lourens Fosett mustaqil nafas olmoqda, transplantatsiya qilingan yurak “hech qanday tashqi qurilmalar yordamisiz normal ishlamoqda”.
Fosettning organizmi yurak-qon tomir kasalliklari va ichki qon ketish bilan bog‘liq asoratlar tufayli inson yuragini qabul qilish uchun yaroqsiz deb topilgandi.
“Oxirgi umidim — cho‘chqa yuragi. Hozir hech bo‘lmaganda shunga imkonim bor”, — degan u operatsiya oldidan.
Transplantatsiyadan so‘ng, organizm donor organni rad etmasligi uchun bemor maxsus dori-darmonlar va antitanalarni qabul qilmoqda.
Avvalgi operatsiya aynan shu tibbiyot markazida 2022-yilda o‘tkazilgan edi. Bemor, 57 yoshli Devid Bennet jarrohlik amaliyotidan ikki oy o‘tib, “ko‘p omillar, jumladan, sog‘lig‘i yomonlashgani tufayli” vafot etgan.
Izoh (0)