Taniqli tadbirkor Hasan Mamasaidov bloger Jahongir Latipovga bergan intervyusida 29 yoshida O‘zbekistonning birinchi prezidenti Islom Karimov bilan uchrashgani haqida so‘zlab bergan.
Tadbirokrning aytishicha, u Islom Karimov bilan 2007-yilgi saylovoldi tadbirlarida uchrashgan.
“Tadbirkorlar nomidan so‘zga chiqib, ularning nomzodlarini qo‘llab-quvvatlaganman. Turib, meni bag‘riga bosib, yaxshi gaplarni gapirganlar.
Menimcha, 2007-yilgacha bo‘lgan yutuqlarimdan ham ko‘ra, eng katta yutuq prezident bilan uchrashuvim edi. Chunki o‘sha paytda uncha-muncha odam davlat rahbari bilan birga turishi, bag‘riga bosib ko‘rishishi, nazariga tushishi katta hodisa edi”, — dedi Hasan Mamasaidov.
Uning alohida taʼkidlashicha, davlat rahbari bilan uchrashuvdan keyin tadbirkorning ustozlaridan biri uni jamoatchilikka ko‘rinmaslikni tavsiya qilgan.
“Uchrashuvdan keyin o‘zimga bo‘lgan ishonch, o‘zimga bo‘lgan hurmat, tabiiyki, ortgan. Lekin yaqin ustozlarimizdan biri menga telefon qilib, “Bugundan boshlab seni televideniyeda yoki efirda, u yoq-bu yoqda intervyu berganingni ko‘rsam, o‘zim qamataman, degan”.
Sen oladigan mukofotingni olding, jim yurgin, ishingni qilgin, deyishardi. Hozirgiga nisbatan ekranlarda ming baravar kam chiqardik. Unda ham ko‘rgazmalarda qisqagina intervyu berishimizni ham ko‘p deyishar edi.
U paytda bitta odam ko‘p ko‘zga ko‘rinishi kerak, boshqalar esa ko‘rinmasligi kerak edi. O‘sha uchrashuvdan keyin to 2017-yilgacha intervyuga chaqirishsa, rad javobini berib kelganman”, — dedi tadbirkor.
Hasan Mamasaidovning taʼkidlashicha, hozir vaziyat o‘zgargan.
“Bir vaqtlar xor bo‘lgan narsa hozir aziz bo‘lib turibdi. Fikrimizni aytyapmiz. Jamiyatga, shuncha insonlarga qiymat va qadriyat beryapmiz”, — dedi u.
Izoh (0)