“Устозим бирор жойда чиқиш қилсанг, ўзим қаматаман, деб огоҳлантирган” — тадбиркор Ҳасан Мамасаидовнинг Ислом Каримов билан учрашуви воқеалари ҳақида

Таниқли тадбиркор Ҳасан Мамасаидов блогер Жаҳонгир Латиповга берган интервьюсида 29 ёшида Ўзбекистоннинг биринчи президенти Ислом Каримов билан учрашгани ҳақида сўзлаб берган.

Тадбирокрнинг айтишича, у Ислом Каримов билан 2007 йилги сайловолди тадбирларида учрашган.

“Тадбиркорлар номидан сўзга чиқиб, уларнинг номзодларини қўллаб-қувватлаганман. Туриб, мени бағрига босиб, яхши гапларни гапирганлар.

Менимча, 2007 йилгача бўлган ютуқларимдан ҳам кўра, энг катта ютуқ президент билан учрашувим эди. Чунки ўша пайтда унча-мунча одам давлат раҳбари билан бирга туриши, бағрига босиб кўришиши, назарига тушиши катта ҳодиса эди”, — деди Ҳасан Мамасаидов.

Унинг алоҳида таъкидлашича, давлат раҳбари билан учрашувдан кейин тадбиркорнинг устозларидан бири уни жамоатчиликка кўринмасликни тавсия қилган.

“Учрашувдан кейин ўзимга бўлган ишонч, ўзимга бўлган ҳурмат, табиийки, ортган. Лекин яқин устозларимиздан бири менга телефон қилиб, “Бугундан бошлаб сени телевидениеда ёки эфирда, у ёқ-бу ёқда интервью берганингни кўрсам, ўзим қаматаман, деган”. 

Сен оладиган мукофотингни олдинг, жим юргин, ишингни қилгин, дейишарди. Ҳозиргига нисбатан экранларда минг баравар кам чиқардик. Унда ҳам кўргазмаларда қисқагина интервью беришимизни ҳам кўп дейишар эди.

У пайтда битта одам кўп кўзга кўриниши керак, бошқалар эса кўринмаслиги керак эди. Ўша учрашувдан кейин то 2017 йилгача интервьюга чақиришса, рад жавобини бериб келганман”, — деди тадбиркор.

Ҳасан Мамасаидовнинг таъкидлашича, ҳозир вазият ўзгарган.

“Бир вақтлар хор бўлган нарса ҳозир азиз бўлиб турибди. Фикримизни айтяпмиз. Жамиятга, шунча инсонларга қиймат ва қадрият беряпмиз”, — деди у.