Qozog‘istondagi g‘isht zavodlarida 60 dan ortiq O‘zbekiston fuqarosi qullikda ishlatilgani haqida xabar berilgan edi. “Dunyo” AA ularga konsullik-huquqiy yordam ko‘rsatilganini ma’lum qildi.
Qayd etilishicha, O‘zbekistonning Olmaota shahridagi bosh konsulligi xodimlari konsullik-huquqiy yordam ko‘rsatish va mehnat qulligidan qutqarilgan fuqarolar holidan xabar olish maqsadida Chimkent shahrida bo‘ldi.
Diplomatlar “Sana sezim” (O‘zbekiston fuqarolariga huquqiy, moddiy va moliyaviy yordam ko‘rsatayotgan) jamoat tashkiloti rahbari bilan birgalikda hozirda 21 nafar O‘zbekiston fuqarosi yashab turgan hostelga tashrif buyurdi. Ularning barchasi Chimkentdagi g‘isht zavodida ishlagan.
Hozirda ikki nafar ish beruvchiga nisbatan jinoiy ish qo‘zg‘atilgan. Chimkent shahar huquq-tartibot idoralarining maʼlum qilishicha, jinoyat ishi qatʼiy nazoratga olingan, O‘zbekiston fuqarolari huquq va manfaatlarini himoya qilish bo‘yicha barcha zarur choralar ko‘rilmoqda.
Ish beruvchidan 21 nafar O‘zbekiston fuqarosining ish haqini qoplash so‘ralgan.
Shuningdek, Chimkentdagi yana bir g‘isht zavodida ishlovchi 40 nafar o‘zbekistonlik bilan bog‘liq vaziyatga aniqlik kiritish maqsadida ish beruvchi va vatandoshlar bilan uchrashilgan.
40 nafar O‘zbekiston fuqarosi ish beruvchiga nisbatan hech qanday da’vosi yo‘qligini va g‘isht zavodida ishlashda davom etishini bildirgan. Fuqarolarga diplomatik muassasalarga murojaat qilish huquq va imkoniyatlari tushuntirilgan. Ularning ish va yashash joylari ham ko‘zdan kechirilgan. Bu borada ham ularda shikoyat va da’volari bo‘lmagan.
Bundan tashqari, bosh konsullik tomonidan ushbu g‘isht zavodida muqaddam ishlagan 4 nafar O‘zbekiston fuqarosiga ish haqini undirish bo‘yicha konsullik-huquqiy yordam ko‘rsatilgan.
Xabarda aytilishicha, ayni paytda bosh konsullik vaziyatni nazorat qilib, jinoyat ishi bo‘yicha tergov jarayoni borishidan xabardor bo‘lib turibdi.
Izoh (0)