Qozog‘iston Ichki ishlar vazirligi xodimlari Chimkentdagi g‘isht zavodlarida noqonuniy ushlab turilgan va ekspluatatsiya qilingan 60 dan ortiq O‘zbekiston fuqarosini ozod qildi. Bu haqda “Polisia.kz” xabar berdi.
Qayd etilishicha, 14-oktyabr kuni Aqto‘be viloyatida yashovchi ayol Olmaota politsiyasiga murojaat qilgan. Uning aytishicha, O‘zbekiston fuqarosi bo‘lgan ukasi Chimkentdagi g‘isht zavodida mehnat qulligidan qochgani va Olmaotaga yetib kelgani, biroq u o‘sha yerda nomaʼlum shaxslar tomonidan o‘g‘irlab ketilgani haqida xabar bergan.
Olmaota va Chimkent shaharlarining uyushgan jinoyatchilikka qarshi kurashish boshqarmasi xodimlari hamkorligida tezkor tadbir o‘tkazilgan. Huquq-tartibot xodimlari Chimkent va Turkiston viloyatlaridagi g‘isht zavodlarining uch nafar egasini qo‘lga olgan. Ularning ikki nafari aka-ukalar.
Ikkita g‘isht zavodi hududini tintuv qilish chog‘ida tezkor xodimlar 60 dan ortiq xorijlik ishchilar borligi, ularning barchasi O‘zbekiston fuqarolari ekani maʼlum bo‘lgan.
Sudga qadar tekshiruv davomida o‘zbekistonliklar zavodga ishga taklif etilgani, keyin esa hujjatlari olib qo‘yilib, maoshlari berilmay kelgani va vaqti-vaqti bilan qo‘rqitish maqsadida jismoniy tazyiqqa uchragani aniqlangan.
G‘isht zavodlari egalariga nisbatan “Mehnat ekspluatatsiyasi maqsadida qonunga xilof ravishda ozodlikdan mahrum qilish” va “Boshqalarning haq-huquqlarini poymol qilish” moddalari bilan jinoyat ishi qo‘zg‘atilgan.
Tashqi mehnat migratsiyasi agentligining ma’lum qilishicha, vaziyat O‘zbekistonning Olmaota shahridagi Bosh konsulxonasi tomonidan nazoratga olingan bo‘lib, surishtiruv davomida hujjatlari yo‘q 40 nafar fuqaro Chimkent shahridagi IIB vaqtinchalik saqlash markaziga va 24 nafari “Sana Sizem” tashkiloti yordamida hostelga joylashtirilgan.
18-oktyabr kuni 40 nafar fuqaroning shaxsni tasdiqlovchi hujjatlari Chimkent shahri politsiyasi bo‘limi xodimlari tomonidan topilgan va ularga nisbatdan Qozog‘istonning Maʼmuriy kodeksi bo‘yicha ish ko‘rilmoqda.
Ushbu holat bo‘yicha Tashqi mehnat migratsiyasi agentligining Chimkent shahridagi vakili tomonidan Qoratau tumani politsiyasi bo‘limida ushbu fuqarolar bilan suhbat o‘tkazilib, ularning huquqlari tushuntirilgan. Fuqarolarning asosiy qismi pasportlari qaytarib berilsa, vatanga qaytishini, ish beruvchiga nisbatan eʼtirozlari yo‘qligini bildirgan.
Avvalroq Rossiyaning Nijniy Novgoroddagi munitsipal bolalar bog‘chasi qurilishida ishlagan o‘zbekistonlik ikki ishchi qullikdan qochishga muvaffaq bo‘lgani to‘g‘risida xabar berilgandi.
Izoh (0)