Қозоғистондаги ғишт заводларида 60 дан ортиқ Ўзбекистон фуқароси қулликда ишлатилгани ҳақида хабар берилган эди. “Дунё” АА уларга консуллик-ҳуқуқий ёрдам кўрсатилганини маълум қилди.
Қайд этилишича, Ўзбекистоннинг Олмаота шаҳридаги бош консуллиги ходимлари консуллик-ҳуқуқий ёрдам кўрсатиш ва меҳнат қуллигидан қутқарилган фуқаролар ҳолидан хабар олиш мақсадида Чимкент шаҳрида бўлди.
Дипломатлар “Сана сезим” (Ўзбекистон фуқароларига ҳуқуқий, моддий ва молиявий ёрдам кўрсатаётган) жамоат ташкилоти раҳбари билан биргаликда ҳозирда 21 нафар Ўзбекистон фуқароси яшаб турган ҳостелга ташриф буюрди. Уларнинг барчаси Чимкентдаги ғишт заводида ишлаган.
Ҳозирда икки нафар иш берувчига нисбатан жиноий иш қўзғатилган. Чимкент шаҳар ҳуқуқ-тартибот идораларининг маълум қилишича, жиноят иши қатъий назоратга олинган, Ўзбекистон фуқаролари ҳуқуқ ва манфаатларини ҳимоя қилиш бўйича барча зарур чоралар кўрилмоқда.
Иш берувчидан 21 нафар Ўзбекистон фуқаросининг иш ҳақини қоплаш сўралган.
Шунингдек, Чимкентдаги яна бир ғишт заводида ишловчи 40 нафар ўзбекистонлик билан боғлиқ вазиятга аниқлик киритиш мақсадида иш берувчи ва ватандошлар билан учрашилган.
40 нафар Ўзбекистон фуқароси иш берувчига нисбатан ҳеч қандай даъвоси йўқлигини ва ғишт заводида ишлашда давом этишини билдирган. Фуқароларга дипломатик муассасаларга мурожаат қилиш ҳуқуқ ва имкониятлари тушунтирилган. Уларнинг иш ва яшаш жойлари ҳам кўздан кечирилган. Бу борада ҳам уларда шикоят ва даъволари бўлмаган.
Бундан ташқари, бош консуллик томонидан ушбу ғишт заводида муқаддам ишлаган 4 нафар Ўзбекистон фуқаросига иш ҳақини ундириш бўйича консуллик-ҳуқуқий ёрдам кўрсатилган.
Хабарда айтилишича, айни пайтда бош консуллик вазиятни назорат қилиб, жиноят иши бўйича тергов жараёни боришидан хабардор бўлиб турибди.
Изоҳ (0)