Қозоғистон Мудофаа вазирлиги Олмаотада “НАТО маркази” очилгани ҳақида Telegram каналларида тарқалган маълумотни рад этди, деб ёзмоқда “Sputnik.kz”.
“Қозоғистон Мудофаа вазирлигига тегишли тинчликпарвар операциялар маркази янги конференс-залининг расмий очилиши Олмаота шаҳрида АҚШнинг Қозоғистондаги элчиси Даниэль Розенблум иштирокида бўлиб ўтди.
Марказ 2006 йилдан буён Қозоғистон Қуролли кучларининг тинчликпарвар бўлинмасини ривожлантириш бўйича таълим муассасаси сифатида фаолият юритиб келмоқда. Унинг асосий мақсади БМТ стандартлари бўйича тинчликпарвар операцияларда иштирок этиш учун шахсий таркибни тайёрлашдан иборат”, — дейилади Мудофаа вазирлиги хабарида.
Конференс-залининг очилиши ҳақидаги маълумотни Қозоғистондаги АҚШ элчихонасининг Facebook расмий саҳифасидан ҳам олиш мумкин.
“Элчи Розенблум Қозоғистон Тинчлик операциялари марказида янги конференс-залининг тантанали очилиш маросимида иштирок этиш шарафига муяссар бўлди. Бу бино Қозоғистоннинг халқаро тинчликпарвар кучларни тайёрлаш имкониятларини кенгайтириш мақсадида Америка Қўшма Штатлари томонидан қўллаб-қувватланган сўнгги лойиҳадир. Қўшма Штатлар хавфсизлик, фаровонлик ва тинчликни сақлаш манфаатлари йўлида Қозоғистон билан ҳамкорлик қилишдан фахрланади”, — деб таъкидлаган дипломатик миссия.
Бир кун аввал қатор оммавий саҳифаларда Олмаотада “НАТО маркази” очилгани, унда АҚШнинг Қозоғистондаги элчиси иштирок этгани ва у ерда тинчликпарвар кучлар гўёки “НАТО стандартлари бўйича” (аслида БМТ стандартлари) ўқитилиши ҳақида хабар берилганди.
Ушбу хабарларга Россия президенти матбуот котиби Дмитрий Песков ҳам муносабат билдирди.
“Тинчликни сақлаш миссияларининг ўзига хос хусусиятлари бор. Қозоқ ҳарбийлари дунёнинг турли бурчакларида шундай миссияларда қатнашмоқда, аммо бутун ўқитиш жараёнининг америкаликлар томонидан олиб борилиши ҳақида, албатта, биз Остонадаги дўстларимиздан қўшимча маълумот кутамиз” — деди у.
Изоҳ (0)