Qozog‘istonda “Chet davlatlardan, xalqaro va xorijiy tashkilotlardan, xorijliklardan pul yoki boshqa shakldagi mol-mulk oladigan shaxslar reyestri” paydo bo‘ldi. Hujjat 20-sentabr kuni Qozog‘iston Moliya vazirligi Davlat daromadlari qo‘mitasi saytiga joylashtirildi.
Ayni paytda ro‘yxatda 240 ta kompaniya va jismoniy shaxslar mavjud. Jumladan:
- Qozog‘iston xalqaro inson huquqlari bo‘yicha byurosi;
- Erkindik Qanaty fondi;
- Qozog‘iston yoshlar informatsion xizmati;
- Media nashri;
- MediaNet xalqaro jurnalistika markazi;
- “Xalqaro huquqiy tashabbus”;
- “Ar.Rux.Xak” huquqni himoya qilish fondi;
- “Әdіl sөz” (“Odil so‘z”) xalqaro so‘z erkinligini himoya qilish fondi;
- “Zelenoye spaseniye” (“Yashil qutqaruv”) ekologik jamiyati.
- Qozog‘iston kasaba uyushmalari federatsiyasi
Respublikada “chet el agenti” deb e’lon qilinganlar orasida jurnalist Aynur Koskina, Majlis deputatligiga sobiq nomzod Dinara Yegeubayeva, jurnalist va “Za nami ujye viyexali” YouTube kanalining muallifi Dmitriy Dubovitskiy bor.
Bundan tashqari, Qozog‘iston hukumati “chet el agentlari” reyestriga xorijiy kompaniyalar va fondlarning vakolatxonalarini ham kiritgan. Masalan, Rossiya “Gazprombank”ining Qozog‘istondagi vakolatxonalari, Reuters xalqaro axborot agentligi vakolatxonasi, “Kiyev vitamin zavodi” filiali va Niderlandiya silga qarshi kurashish markazining Markaziy Osiyodagi vakolatxonasi ham ro‘yxatdan o‘rin olgan.
Izoh (0)