Gollivudning taniqli aktyori va sobiq restler Dueyn Jonson Parijdagi Greven muzeyiga joylashtirilgan mum haykalining rangini o‘zgartirishni so‘radi. Bunga Jonsonning teri rangi noto‘g‘ri tanlangani sabab bo‘lgan.
Ijtimoiy tarmoq foydalanuvchilari haykalning teri rangi haddan tashqari och ekanligini payqashgan. Maʼlumot uchun, aktyorning kelib chiqishi afrikaliklar, kanadaliklar va samoaliklarga borib taqaladi.
“Men o‘z jamoamdan Parijning Greven muzeyidagi do‘stlarimiz bilan mum haykalimni qayta ishlash, unga ayrim muhim o‘zgartirishlarni kiritish, jumladan, teri rangini o‘zgartira olishimiz uchun bog‘lanishlarini so‘radim. Keyingi safar Parijga borganimda o‘zim bilan birga qadah ko‘tarish uchun u yerga kirib o‘taman”, — deb yozdi Jonson o‘zining Instagram sahifasida.
Maʼlumot uchun, bugungi kunda Greven muzeyida 450 ta mum haykal mavjud bo‘lib, ular orasidan Rayan Gosling, Ledi Gaganing “qiyofadoshlari”ni ham topish mumkin. Jonson yaqindagina “Forsaj-10” filmida suratga tushgan edi. Shu yilning oxiriga qadar esa Kris Evans bilan birgalikda “Qizil” komediyasi orqali ekranlarda ko‘rinish berishi rejalashtirilgan.
Izoh (0)