Голливуднинг таниқли актёри ва собиқ рестлер Дуэйн Жонсон Париждаги Гревен музейига жойлаштирилган мум ҳайкалининг рангини ўзгартиришни сўради. Бунга Жонсоннинг тери ранги нотўғри танлангани сабаб бўлган.
Ижтимоий тармоқ фойдаланувчилари ҳайкалнинг тери ранги ҳаддан ташқари оч эканлигини пайқашган. Маълумот учун, актёрнинг келиб чиқиши африкаликлар, канадаликлар ва самоаликларга бориб тақалади.
“Мен ўз жамоамдан Парижнинг Гревен музейидаги дўстларимиз билан мум ҳайкалимни қайта ишлаш, унга айрим муҳим ўзгартиришларни киритиш, жумладан, тери рангини ўзгартира олишимиз учун боғланишларини сўрадим. Кейинги сафар Парижга борганимда ўзим билан бирга қадаҳ кўтариш учун у ерга кириб ўтаман”, — деб ёзди Жонсон ўзининг Instagram саҳифасида.
Маълумот учун, бугунги кунда Гревен музейида 450 та мум ҳайкал мавжуд бўлиб, улар орасидан Райан Гослинг, Леди Гаганинг “қиёфадошлари”ни ҳам топиш мумкин. Жонсон яқиндагина “Форсаж-10” фильмида суратга тушган эди. Шу йилнинг охирига қадар эса Крис Эванс билан биргаликда “Қизил” комедияси орқали экранларда кўриниш бериши режалаштирилган.
Изоҳ (0)