Toshkent shahri va Toshkent viloyatida kuchli taʼsir qiluvchi dori vositalarini sotayotgan shaxslar ushlandi, deb xabar beradi Bosh prokuratura huzuridagi departament.
Qayd etilishicha, departamentning Mirzo Ulug‘bek tuman bo‘limi tomonidan DXX va IIV xodimlari bilan hamkorlikda tezkor tadbir o‘tkazilgan. Tadbirda A.Sh. ismli shaxs va boshqalar 1 000 dona “Zardeks” nomli kuchli taʼsir qiluvchi dori vositasini fuqaro X.Sh.ga 25 million so‘mga sotgan vaqtida ushlangan. Shuningdek, A.Sh.ning yonidan 220 dona va uning xonadonidan yana 1 800 dona “Zardeks” nomli dori vositasi ashyoviy dalil sifatida olingan.
Shu kabi, departamentning Oqqo‘rg‘on tuman bo‘limi tomonidan o‘tkazilgan tezkor tadbirda H.M. ismli shaxs 5 dona “Tropikomid” nomli kuchli taʼsir qiluvchi dori vositasini fuqaro B.A.ga 1 mln so‘mga sotgan vaqtida ushlanib, uning xonadonidan sotish uchun mo‘ljallangan 103 dona “Tropikomid” dori vositasi ashyoviy dalil sifatida olingan.
Mazkur holatlar yuzasidan Jinoyat kodeksining 251-1-moddasi (Kuchli taʼsir qiluvchi yoki zaharli moddalarni qonunga xilof ravishda muomalaga kiritish) bilan jinoyat ishlari qo‘zg‘atilib, tergov harakatlari o‘tkazilmoqda.
Izoh (0)