Тошкент шаҳри ва Тошкент вилоятида кучли таъсир қилувчи дори воситаларини сотаётган шахслар ушланди, деб хабар беради Бош прокуратура ҳузуридаги департамент.
![](/static/2023/Fozilbek/photo_2023-10-16_11-23-10.jpg)
Қайд этилишича, департаментнинг Мирзо Улуғбек туман бўлими томонидан ДХХ ва ИИВ ходимлари билан ҳамкорликда тезкор тадбир ўтказилган. Тадбирда А.Ш. исмли шахс ва бошқалар 1 000 дона “Зардекс” номли кучли таъсир қилувчи дори воситасини фуқаро Х.Ш.га 25 миллион сўмга сотган вақтида ушланган. Шунингдек, А.Ш.нинг ёнидан 220 дона ва унинг хонадонидан яна 1 800 дона “Зардекс” номли дори воситаси ашёвий далил сифатида олинган.
Шу каби, департаментнинг Оққўрғон туман бўлими томонидан ўтказилган тезкор тадбирда Ҳ.М. исмли шахс 5 дона “Тропикомид” номли кучли таъсир қилувчи дори воситасини фуқаро Б.А.га 1 млн сўмга сотган вақтида ушланиб, унинг хонадонидан сотиш учун мўлжалланган 103 дона “Тропикомид” дори воситаси ашёвий далил сифатида олинган.
Мазкур ҳолатлар юзасидан Жиноят кодексининг 251-1-моддаси (Кучли таъсир қилувчи ёки заҳарли моддаларни қонунга хилоф равишда муомалага киритиш) билан жиноят ишлари қўзғатилиб, тергов ҳаракатлари ўтказилмоқда.