Sirdaryo viloyat IIB, DXX Sirdaryo viloyati bo‘yicha boshqarmasi hamda viloyat Bojxona boshqarmasi xodimlari bilan hamkorlikda o‘tkazilgan tezkor tadbiri davomida kuchli ta’sir qiluvchi dori vositalarining savdosiga chek qo‘yildi.
Qayd etilishicha, fuqaro J.M. boshqaruvida bo‘lgan Lacetti Sirdaryo tumani “Dehqonobod” mahallasi hududiga kelib, Jizzax viloyati, Paxtakor tumanida yashovchi 24 yoshli S.S bilan uchrashgan va mashinada Mirzaobod tumaniga qarab harakatlanib ketayotgan vaqtida to‘xtatilgan.
Avtomobil xolislar ishtirokida shaxsiy tintuv qilinganida, J.M.ning yonidan 1 dona sellofan paketga joylashtirilgan 11 dona, avtomashinasi ko‘zdan kechirilganda esa 6 dona sellofan paketchaga joylashtirilgan jami 84 dona tarkibida kuchli taʼsir qiluvchi modda bo‘lgan dori vositalari aniqlanib, ashyoviy dalil sifatida olingan.
Tezkor tadbir davomida fuqaro S.S. ham ushlanib, xolislar ishtirokida shaxsiy tintuv qilinganda, yonida bo‘lgan sumkasi ichidan 11 dona sellofan paketlarga joylashtirilgan jami 154 dona dori vositalari va 2,5 million so‘mdan ortiq pullar topilgan.
Olib borilgan tergovga qadar tekshiruv jarayonida, fuqaro J.M. yonidan hamda avtomashinasidan aniqlangan jami 95 dona dori vositalarni fuqaro S.S.dan 2,5 million so‘mga evaziga sotib olgani ma’lum bo‘lgan. O‘z navbatida fuqaro S.S. mazkur dori vositalarni Jizzax viloyati Paxtakor tumanida yashovchi K.K.dan olib, uning Guliston shahar va Toshkent viloyatidagi dori vositalar isteʼmol qiluvchi mijozlariga sotib, pullarni yetkazib berishlik uchun olib kelayotgani aniqlangan. Shundan so‘ng tezkor tadbir davom ettirilib, fuqaro K.K. Paxtakor tumanidagi yashash xonadonida ushlangan. Hozirda mazkur holat yuzasidan tergovga qadar tekshiruv harakatlari davom etmoqda.
Giyohvand moddalar savdosi
Mart oyi o‘rtalarida DXX Chegara qo‘shinlari va Namangan viloyati bo‘yicha boshqarma harbiy xizmatchilari tomonidan olib borilgan tezkor-qidiruv tadbirlarida katta miqdordagi narkotik moddalarning o‘zbek-qirg‘iz davlat chegarasidan noqonuniy o‘tkazilgan holati aniqlangandi.
Shuningdek, Navoiy viloyatida narkotik moddalar savdosi bilan shug‘ullanuvchi jinoiy guruh qo‘lga olingani, Toshkentda giyohvand moddalar savdosi bilan shug‘ullangan talabalar ushlangani, shuningdek, Samarqanddagi tungi klubda 10 ming AQSH dollari evaziga giyohvand modda sotishga uringanlar qo‘lga tushgani to‘g‘risida xabar berilgandi.
Izoh (0)