Yaylov yerlardan foydalanish sohasidagi qonunchilik hujjatlari takomillashtirilgani munosabati bilan Vazirlar Mahkamasining qarori bilan tasdiqlangan O‘zbekiston hududida chegara rejimi to‘g‘risidagi nizomga o‘zgartirish va qo‘shimcha kiritish bo‘yicha hukumat qarori qabul qilindi.
Xususan, O‘zbekiston hududida chegara rejimi to‘g‘risidagi nizomni tasdiqlash haqidagi nizom chegaraoldi zonasida va chegaraoldi mintaqasidagi yaylov yerlardan foydalanish tartibini belgilovchi bob bilan to‘ldirilmoqda.
Chegaraoldi zonasida va chegaraoldi mintaqasidagi yaylov yerlardan Qishloq xo‘jaligi vazirligi huzuridagi Ipakchilik va jun sanoatini rivojlantirish qo‘mitasi tomonidan bir yilda bir marotaba shakllantiriladigan ro‘yxatga kiritilgan shaxslar foydalanishlari mumkin. Shakllantirilgan ro‘yxat DXX Chegara qo‘shinlari va ichki ishlar organlariga yuboriladi.
Yerdan foydalanish ijara huquqi asosida amalga oshiriladi, mollarni o‘tlatishga faqatgina kunduz kuni ruxsat beriladi. Shaxs yerdan foydalanish huquqini yo‘qotganda qo‘mita 10 kunlik muddat ichida DXX Chegara qo‘shinlari va ichki ishlar organlarini xabardor etadi.
Hujjat qonun hujjatlari maʼlumotlari milliy bazasida davlat tilida eʼlon qilingan va 2023-yil 10-oktyabrda kuchga kirgan.
Eslatib o‘tamiz, 2022-yilda O‘zbekistonda chegara oldi hududlarda xavfsizlikni ta’minlash maqsadida 120 ta mobil guruh tashkil etilgani to‘g‘risida xabar berilgandi. Kuch tuzilmalari bilan hamkorlikda cho‘pon, ovchi va o‘rmon xo‘jaligi xodimlarini jalb qilgan holda 2022-yilning o‘tgan davri davomida chegaraoldi, tog‘li va borish qiyin bo‘lgan hududlarda 2 154 marotaba razved-qidiruv tadbirlari o‘tkazilgan.
Izoh (0)