Яйлов ерлардан фойдаланиш соҳасидаги қонунчилик ҳужжатлари такомиллаштирилгани муносабати билан Вазирлар Маҳкамасининг қарори билан тасдиқланган Ўзбекистон ҳудудида чегара режими тўғрисидаги низомга ўзгартириш ва қўшимча киритиш бўйича ҳукумат қарори қабул қилинди.
Хусусан, Ўзбекистон ҳудудида чегара режими тўғрисидаги низомни тасдиқлаш ҳақидаги низом чегараолди зонасида ва чегараолди минтақасидаги яйлов ерлардан фойдаланиш тартибини белгиловчи боб билан тўлдирилмоқда.
Чегараолди зонасида ва чегараолди минтақасидаги яйлов ерлардан Қишлоқ хўжалиги вазирлиги ҳузуридаги Ипакчилик ва жун саноатини ривожлантириш қўмитаси томонидан бир йилда бир маротаба шакллантириладиган рўйхатга киритилган шахслар фойдаланишлари мумкин. Шакллантирилган рўйхат ДХХ Чегара қўшинлари ва ички ишлар органларига юборилади.
Ердан фойдаланиш ижара ҳуқуқи асосида амалга оширилади, молларни ўтлатишга фақатгина кундуз куни рухсат берилади. Шахс ердан фойдаланиш ҳуқуқини йўқотганда қўмита 10 кунлик муддат ичида ДХХ Чегара қўшинлари ва ички ишлар органларини хабардор этади.
Ҳужжат қонун ҳужжатлари маълумотлари миллий базасида давлат тилида эълон қилинган ва 2023 йил 10-октябрда кучга кирган.
Эслатиб ўтамиз, 2022 йилда Ўзбекистонда чегара олди ҳудудларда хавфсизликни таъминлаш мақсадида 120 та мобил гуруҳ ташкил этилгани тўғрисида хабар берилганди. Куч тузилмалари билан ҳамкорликда чўпон, овчи ва ўрмон хўжалиги ходимларини жалб қилган ҳолда 2022 йилнинг ўтган даври давомида чегараолди, тоғли ва бориш қийин бўлган ҳудудларда 2 154 маротаба развед-қидирув тадбирлари ўтказилган.
Изоҳ (0)