Maktabgacha va maktab taʼlimi vazirligi tomonidan Isteʼdodli yoshlarni qo‘llab-quvvatlash “Ulug‘bek” jamg‘armasi bilan hamkorlikda tashkil etilgan “Mirzo Ulug‘bek” onlayn maktabining ochilish marosimi bo‘lib o‘tdi.
Onlayn maktab doirasida hozirda test-sinov tariqasida uchta tog‘li va chekka hududdagi maktablar tanlab olingan. Bular Jizzax viloyati Forish tumani 7-sonli, Samarqand viloyati Qo‘shrabod tumani 70-sonli va Surxondaryo viloyati Denov tumani 62-sonli maktablardir.
Mazkur maktablarda yuqori sinf o‘qivchilari matematika va ingliz tili fanlaridan qo‘shimcha taʼlim oladi.
“Ushbu onlayn maktabni tashkil qilishdan maqsad respublikaning chekka hududlari va tog‘li joylarda taʼlim sifatini oshirish hamda ushbu hududlarda istiqomat qilayotgan isteʼdodli yoshlarni qo‘llab-quvvatlashdan iborat”, — deyiladi xabarda.
Mazkur loyiha test-sinov jarayonida ijobiy natijalar olingandan so‘ng respublikaning boshqa tog‘li va chekka hududlaridagi taʼlim muassasalariga joriy etilishi rejalashtirilgan.
Avvalroq O‘zbekistonda 100 ta “Barkamol avlod” maktabida STEAM-ta’lim laboratoriyasi tashkil etilishi to‘g‘risida xabar berilgandi.
Izoh (0)