Namanganda o‘z uyida qalbaki dori ishlab chiqargan shaxs aniqlandi

Namangan viloyatida qalbaki dori vositalarini muomalaga kiritilishining oldi olindi, deb xabar beradi Bosh prokuratura huzuridagi departament.

Qayd etilishicha, departamentning Yangi Namangan tuman bo‘limi tomonidan tergovga qadar tekshiruv o‘tkazildi. Tadbirda fuqaro M.SH. o‘z uyida yashirin sex tashkil etib, “Piratsetam” dori vositasini qimmat narxlarda o‘tkazish maqsadida “Panavir” nomi ostida qayta qadoqlab ishlab chiqarayotgani aniqlangan. Tekshiruv davomida 672 quti “Piratsetam”, 299 quti “Panavir” nomi tushirilgan dori vositasi hamda 12 750 dona yorliq va 2 550 dona dori vositasi o‘rovi uchun maxsus quti ashyoviy dalil sifatida olingan.

Mazkur holat yuzasidan Jinoyat kodeksining 186-3-moddasi (sifatsiz yoki qalbakilashtirilgan dori vositalarini yoxud tibbiy buyumlarni o‘tkazish maqsadida ishlab chiqarish, tayyorlash, olish, saqlash, tashish yoki o‘tkazish) bilan jinoyat ishi qo‘zg‘atilib, tergov harakatlari o‘tkazilmoqda.

Avvalroq Samarqand shahrida ko‘p qavatli uyda qalbaki dori vositalari ishlab chiqarayotgan yashirin sex aniqlangani, Toshkentdagi dorixonalarda qalbaki dori sotilayotgani maʼlum bo‘lgani to‘g‘risida xabar berilgandi.