UzAuto Motors 2024-yilgacha ommabop avtomobillar uchun shartnoma bermaydimi?

UzAuto Motors kompaniyasi ommabop avtomobillar uchun shartnomalar 2024-yilga qadar ochilmasligi aytilgan xabarlarga munosabat bildirdi.

Ijtimoiy tarmoqlarda ommabop avtomobillar uchun shartnomalar 2024-yilga qadar ochilmasligi haqida xabarlar tarqaldi. “O‘zavtosanoat” aksiyadorlik jamiyati matbuot xizmati rahbari Zumrad Shojalilovaning “Daryo”ga ma’lum qilishicha, ushbu xabarlar yolg‘on.

“Hurmatli mijozlar, UzAuto Motors faoliyati to‘g‘risida faqatgina kompaniya rasmiy sahifalari orqali bilib olishingiz mumkin”, — deyiladi munosabatda.

Eslatib o‘tamiz, UzAuto Motors 4-avgust kuni ishlab chiqarish liniyalarida amalga oshirilgan modernizatsiya ishlari, shuningdek, zavod faoliyati samaradorligining oshishi hisobiga 2023-yilda qo‘shimcha 50 000 dona avtomobil ishlab chiqarish imkoniyati yaratilganini ma’lum qilgan edi. Ertasiga, 5-avgustda esa shartnoma berish to‘xtatilgani ma’lum qilingandi.

Shuningdek, 18-sentabr kuni UzAuto Motors rasmiy saytida ko‘rsatilgan komplektatsiya va ranglardagi Chevrolet Cobalt, Lacetti, Damas va Labo avtomobillari uchun kontraktatsiya ochildi va ko‘p o‘tmay Cobalt va Lacetti uchun shartnoma berish to‘xtatildi.