Qashqadaryo viloyatidagi yerga oid qonunbuzilishlarining eng ko‘pi Yakkabog‘ va Qarshi tumanlari hisobiga to‘g‘ri kelishi ma’lum bo‘ldi. Bu haqda “Daryo”ga Kadastr agentligining Qashqadaryo viloyati boshqarmasi axborot xizmati rahbari Namoz Choriyev xabar berdi.
Ta’kidlanishicha, viloyatda boshqarma va uning hududiy bo‘limlari tomonidan so‘nggi 9 oy davomida yer uchastkalarini o‘zboshimchalik bilan egallab olish va ushbu yer uchastkalarida noqonuniy imorat qurilishiga oid holatlar o‘rganib chiqilgan.
O‘rganishlar davomida 1524 ta holatda 775,9 gektar yer maydonida qonunbuzarlik holatlari aniqlandi. Shundan 592 ta holatdagi 283,2 gektar yer maydondagi holatlar fuqarolar tomonidan ixtiyoriy tarzda bartaraf etildi, — deydi Namoz Choriyev.
O‘rganish xulosalariga asoslanib, Fuqarolik ishlari bo‘yicha sudlarga yer uchastkalarini o‘zboshimchalik bilan egallangan yer maydonida noqonuniy qurilgan imoratlarni bartaraf etish to‘g‘risida 781 ta (468,7,4 gektar) da’vo arizalari kiritilgan.
Shahar, tumanlar kesimida tahlil qilinganda, yerlarni huquqiy hujjatlarsiz noqonuniy egallab olish holatlarining eng ko‘pi Yakkabog‘ (126 ta holatda, 19,9 gektar maydonda) va Qarshi tumanida (122 ta holatda, 100,9 gektar maydonda) Koson tumanida 109 ta holatda 141,6 gektarni tashkil qilishi ma’lum bo‘ldi, — deydi mas’ul.
Boshqarma axborot xizmati yerlarni noqonuniy egallab olish qonunchilikka ko‘ra, ma’muriy va jinoiy javobgarlikka sabab bo‘lishini eslatgan.
Izoh (0)