O‘zbekiston elchisi Furqat Siddiqov Braziliyaning AQSHdagi elchisi Mariya Viotti bilan uchrashuv o‘tkazdi. Bu haqda “Dunyo” agentligi xabar berdi.
Mariya Viotti Braziliyada o‘rnatilgan protokol tartib va taomillarga muvofiq hamda O‘zbekiston elchisini akkreditatsiya qilish masalasini tezlashtirish maqsadida, ushbu mamlakat Tashqi ishlar vazirligi unga ishonch yorlig‘i nusxasini qabul qilish uchun vakolat berganligini maʼlum qilgan. Shu munosabat bilan Braziliyaning AQSHdagi diplomatik vakolatxonasida O‘zbekistonning Braziliyadagi elchisi (qarorgohi Vashingtonda) tayinlanganli to‘g‘risidagi ishonch yorlig‘i nusxasini topshirish marosimi bo‘lib o‘tgan.
Braziliya elchisi so‘nggi yillarda ikki tomonlama savdo aylanma misli ko‘rilmagan darajada oshib yanvar-avgust oylarida 500 million dollarga yetganini, O‘zbekiston Braziliyaning Markaziy Osiyo mintaqasidagi asosiy iqtisodiy hamkoriga aylanganini qayd etgan.
Uchrashuv davomida Braziliya hukumati tomonidan Toshkentda elchixona ochish masalasi o‘rganib chiqilayotgani maʼlum qilingan.
Uchrashuv yakunida tomonlar ishonch yorlig‘ining asl nusxasini Braziliya prezidenti Luis da Silvaga topshirish uchun O‘zbekiston elichisining ushbu mamlakatga tashrifini 2023-yilning oxiriga qadar uyushtirish bo‘yicha kelishib olgan.
Avgust oxirlarida O‘zbekistonning AQSHdagi elchisi Furqat Siddiqov o‘rindoshlik asosida O‘zbekistonning Braziliyadagi elchisi etib tayinlangandi. 2017-yildan beri O‘zbekistonning AQSHdagi elchisi sifatida ishlagan Javlon Vahobov 2-aprel kuni O‘zbekistonning AQSH, Kanada va Braziliyadagi elchisi lavozimidagi faoliyatini yakunlab, O‘zbekistonga qaytib kelgandi.
Izoh (0)