Aholiga 3,2 milliard so‘m miqdordagi sifatsiz dorilar sotilishining oldi olindi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti boshlig‘i Dilshod Rahimov maʼlum qildi.
Qayd etilishicha, sifatsiz yoki qalbaki dori vositalarining noqonuniy aylanmasiga chek qo‘yish borasida olib borilgan tezkor-qidiruv tadbirlarida 56 ta holatda 3,2 milliard so‘mdan ortiq sifatsiz dorilarning aholiga sotilishining oldi olingan.
Shu bilan bir qatorda, kuchli taʼsir qiluvchi, narkotik hamda psixotrop moddalarni saqlash va o‘tkazish bilan bog‘liq huquqbuzarliklarga qarshi kurashish tadbirlari kuchaytirilib, fosh etilgan 90 ta jinoyat ishi doirasida 423 million so‘mlik bunday turdagi dorilar noqonuniy muomaladan olib qo‘yilgan.
Bundan tashqari, o‘z xatosini bartaraf etmagan, soliq solinadigan bazani yashirish, kamaytirib ko‘rsatish va soliqlarni to‘lashdan qasddan bo‘yin tovlash orqali nohalol raqobatni vujudga keltirish harakatini davom ettirgan subyektlarga 3,3 trillion so‘m soliqlar qo‘shimcha hisoblanib, ularning 521,5 milliard so‘mi budjetga undirilishi taʼminlangan.
Bundan oldin Sirdaryoda 1,8 milliard so‘mlik tamaki va dori vositalarining noqonuniy aylanmasi fosh etilgandi. Avgust boshlarida esa Namanganda 550 million so‘mlik dori vositalari yo‘q qilingani, O‘zbekiston aholisi ehtiyoji uchun Ukraina kompaniyasi ishlab chiqaradigan yuqori sifatli dorilar yetkazilishi to‘g‘risida xabar berilgandi.
Izoh (0)