Европада Хавфсизлик ва Ҳамкорлик Ташкилотининг (ЙХҲТ) Ашхободдаги ваколатхонаси Туркманистон пойтахтида божхона механизмларини модернизация қилиш ва экспорт тартиб-қоидаларини такомиллаштириш масалаларига бағишланган семинар ўтказганини хабар қилди. Тадбирда божхоначилар, молиячилар, банкирлар, тадбиркорлар, Туркманбоши халқаро денгиз порти вакиллари иштирок этди.
ЙХҲТнинг маҳаллий маркази раҳбари Жон Макгрегор йиғилганларга мурожаат қилди:
“ЙХҲТ минтақавий ва халқаро иқтисодий алоқаларни сақлаб қолиш ва янада ривожлантириш, жумладан, савдони осонлаштириш, иқтисодий ривожланиш ва ўсишни жадаллаштириш, қўшилган қийматга эга маҳсулотлар экспортини диверсификация қилиш ва пировардида минтақавий диверсификацияланган иқтисодиётларни барпо этиш орқали ортиб бораётган эҳтиёжни қондиришга катта аҳамият бермоқда”.
Тадбирда жаҳон савдосини тартибга солиш стандартлари, эркин иқтисодий зоналарда божхона назорати, экспорт ҳужжатлари ва “ягона дарча” лойиҳаси ҳақида сўз юритилди.
Бундан ташқари, кун тартибидан божхона тартиб-қоидаларини рақамлаштириш, порт ҳамжамияти тизимини ривожлантириш ва Жаҳон савдо ташкилотининг (ЖСТ) тариф сиёсати каби масалалар ҳам ўрин олган.
Қуруқликда Туркманистон Афғонистон, Эрон, Қозоғистон ва Ўзбекистон билан чегарадош. Каспий денгизида мамлакат Озарбайжон, Эрон, Қозоғистон ва Россия билан чегарага эга.
Изоҳ (0)