Turkmaniston prezidenti Serdar Berdimuhamedovga “Oltin Ay” oltin belgisi bilan oliy mukofot — “Turkmaniston qahramoni” unvoni berildi. Bu haqda mahalliy nashr xabar berdi.

“Turkmaniston Majlisi mamlakatning hurmatli prezidenti Berdimuhamedov Serdar Gurbanguliyevichga oliy darajadagi unvon berish to‘g‘risida qaror qabul qildi”, — deyiladi xabarda.

Prezidentga ushbu unvonga “Turkmaniston milliy mustaqilligi asoslarini, mamlakatning betaraflik tamoyillarini mustahkamlashga qo‘shgan ulkan shaxsiy hissasi, demokratik, huquqiy va dunyoviy davlatni jadal rivojlantirishda davlat va jamiyat oldidagi alohida xizmatlari uchun” sazovor bo‘lgan.

• Serdar Berdimuhamedov 2022-yil martida bo‘lib o‘tgan navbatdan tashqari saylovlarda g‘alaba qozonib, Turkmaniston prezidenti bo‘ldi. Bungacha mamlakatni 2006—2022-yillarda boshqargan otasi Gurbanguli Berdimuhamedov o‘zining “oson bo‘lmagan” qarorini eʼlon qildi va lavozimni tark etdi.
• 2023-yil yanvarida sobiq prezident Gurbanguli Berdimuhamedov milliy lider deb e’lon qilindi. Shu oyda mamlakat prezidenti Serdar Berdimuhamedovga general unvoni berildi. 2023-yil iyun oyida Turkmanistonda Gurbanguli Berdimuhamedov nomi bilan atalgan Arkadag‘ shahri ochildi.
• Shahar poytaxtdan 30 kilometr uzoqlikda joylashgan. U 73 ming kishiga mo‘ljallangan. Mamlakat rasmiylari qurilish uchun 5 milliard dollar sarflagan.