Ўзбекистонда рўйхатдан ўтмай фаолият юритаётган Yandex.Gо (Taxi) хизмати тармоқларда кескин эътирозларга сабаб бўлмоқда. Фаоллар мазкур компания солиққа тортилиши, яъни бошқа иштирокчилар қатори қонунларга риоя қилган ҳолда ишлашини талаб қилмоқда.
Yandex.Gо (Taxi) солиққа тортиладими?
Yandex.Gо хизмати ҳақида ўнлаб постлар эълон қилган иқтисодчи Отабек Бакиров масъулларга “Ўзбекистондан солиқ тўламасдан, реал кунлик режимда олиб чиқиб кетаётган пулларининг схемалари ҳақида ёзиш маънога эгами? Асосийси, хавфсизми?”, деган саволларни берган.
“Яндексни Ўзбекистон ҳуқуқий ва солиқ резидентлигига қайтариш бюджет билан боғлиқ мувозанат издан чиққан бугунги реалликларда энг асосий масалалардан бири бўлиши керак.
Лекин бизнинг номимиздан иш кўрадиган, уч соатда ҳар қандай қонунларни ўзгартириб юборишга тайёр парламентимиз жим. Ҳукуматимиз жим. Келишиб олинган жимликнинг сабаби Яндекс бенефициарлари шимолдаги оғаларга бориб тақалмайдими?” — деди иқтисодчи.
Блогер, ҳуқуқшунос Хушнудбек Худойбердиев ўз Telegram каналида “Нега Yandex.Gо (Taxi) Ўзбекистонда рўйхатдан ўтмаган? Нега бошқа такси агрегаторлари каби тенг солиқ тўламайди? Уларнинг шохи борми?” деган саволларни қўйган.
“Негадир Yandex.Gо хизматидан фойдаланганда терминаллар орқали пластик карта билан тўлаш имкони йўқ. Тўлов учун ҳеч қанақа чек ҳам берилмайди.
Чунки Yandex Ўзбекистонда юридик шахс ташкил қилмасдан, бошқача айтганда, юртимизда солиқ резиденти бўлмасдан туриб, юз минглаб фуқароларга хизмат кўрсатади. Тушган миллиардлаб пуллар эса Нидерландиядаги ҳисобрақамга ўтказилади.
Гарчи аввалги баёнотларда биз шунчаки дастурий таъминот сотамиз, такси хизмати кўрсатмаймиз, дейишгани билан, бу гаплар шунчаки эртак ва сафсата. Сабаби тизимга уланган пластик рақам орқали тўлов амалга оширилса, пул Ўзбекистонда рўйхатдан ўтган таксопарклар ҳисобига эмас, балки Yandex ҳисобига ечилади. Тариф ва нархни, маршрутни ва такси хизмати учун муҳим бўлган бошқа жиҳатларни ҳам Yandex белгилайди. Бошқача айтганда, Ўзбекистон қонунчилиги бўйича, Yandex тўлиқлигича йўловчиларга транспорт хизмати кўрсатиш тўғрисидаги битим иштирокчиси ҳисобланади.
Аммо ушбу компаниянинг такси хизмати кўрсатиш учун, электрон тўловлар қабул қилиш учун лицензияси йўқ. Ўзбекистонда рўйхатдан ўтмаган, солиқ резиденти ҳам эмас. Ахир бу қип-қизил солиқдан қочиш схемаси эмасми? Бунақада соғлом рақобат ҳақида яна қанақа гап бўлиши мумкин?” — дейди блогер.
Солиқ қўмитаси мазкур ҳолат бўйича “Дарё”га изоҳ берди.
Маълум қилинишича, жорий йилнинг сентябр ойида Ridetech International B.V. (Yandex.Gо) компаниясига икки ой муддатда ўз фаолиятини қонун ҳужжатлари асосида ташкил этиш бўйича Солиқ қўмитаси томонидан қуйидаги талаблар қўйилган:
1. Фаолиятни амалга ошириш учун Ўзбекистон Республикасининг солиқ резиденти сифатида рўйхатдан ўтиш ва белгиланган солиқларни тўлаш;
2. Солиқ органлари ахборот тизими билан интеграциялашувни таъминлаш ва мижозларга автоматик шакллантириладиган фискал чек тақдим этиш.
2023 йил 1 декабрга қадар юқоридаги талаблар бажарилмаган тақдирда, Солиқ қўмитаси Рақамли технологиялар вазирлигига Yandex.Gо компаниясининг Ўзбекистон ҳудудида агрегатор сифатида фойдаланиб келинаётган электрон платформадан фойдаланишни блоклаш бўйича расмий мурожаат билан чиқишини маълум қилади.
Yandex компанияси мазкур ҳолат бўйича “Дарё”га изоҳ берди.
Yandex компанияси мамлакатда Давлат солиқ қўмитаси билан бу борада ҳамкорликни бошлаган биринчи платформа экани ҳақида таъкидлаб ўтди.
“Yandex.Gо Ўзбекистонда одатдагидек ишламоқда ва шундай давом этади. Биз Давлат солиқ қўмитаси билан маҳаллийлаштириш мавзусида мулоқот олиб боряпмиз ва бозор амалиёти устида ҳамкорликда ишлаяпмиз. Такси онлайн буюртма бериш хизматларида фискал тушумлар бозор учун кўп меҳнат талаб қиладиган жараён ҳисобланади.
Биз мамлакатда Давлат солиқ қўмитаси билан бу борада ҳамкорликни бошлаган биринчи платформамиз”, — дейилади расмий изоҳда.
Изоҳ (0)