Ijtimoiy tarmoqlarda Yandex.Taxi taksi-agregatori soliqlardan bo‘yin tovlagani uchun 2023-yilning sentabr oyidan O‘zbekistondagi faoliyatini to‘xtatishi mumkinligi haqida xabarlar tarqaldi. Ularda aytilishicha, taksi xizmati bozoriga Yandex Go o‘rniga Estoniyaning Bolt va Ukrainaning Uklon kompaniyalari kirib keladi. “Factchecknet.uz” nashri ushbu hali tasdiqlanmagan ma’lumotni tekshirib ko‘rdi.
Yozilishicha, Yandex.Taxi O‘zbekistonda 200 ga yaqin rasmiy hamkor tuzilmalar orqali faoliyat olib boradi. Xizmatning mamlakatdagi hamkorlaridan biri bo‘lgan Ya Grup Tash MChJ vakili tarqatilayotgan xabarlarning haqiqatga to‘g‘ri kelmasligini ta’kidlagan.
“Biz odatiy rejimda ishlashda davom etmoqdamiz. Hamkorlikning tugatilishi haqida hech qanday yangilik yo‘q”, — deydi vakil.
Bundan tashqari, xabarda qayd etilishicha, Uklon va Bolt kompaniyalarining O‘zbekistonga kirib kelishi ehtimoli bor. Ammo bu jarayon Yandex.Taxi’ning mamlakatdagi faoliyati bilan aloqador emas. Ukrainaning Uklon kompaniyasi 2023-yil oxirigacha 3 ta mamlakat, jumladan, O‘zbekiston hududiga o‘z xizmatlari bilan kirib borishini ma’lum qilgan. Bolt ham (avvalgi nomi — Taxify) 2018-yillarda o‘z faoliyat doirasini kengaytirish uchun Markaziy Osiyo mamlakatlarini munosib variant sifatida ko‘rishini bildirgan.
Yandex Go’dan tushgan daromad qanday taqsimlanadi?
Ma’lumot uchun, bugungi kunda respublikada Yandex.Taxi xizmati ko‘rsatishni tashkil etuvchi 135 ta yo‘lovchi tashish agregatori (korxona) mavjud. 2021—2022-yillar uchun 135 ta agregatorning Yandex.Taxi platformasi orqali O‘zbekistonda xizmatlar ko‘rsatishdan olingan umumiy daromadi 1 trillion so‘mni tashkil etib, quyidagicha taqsimlangan:
- 84 foiz yoki 889,6 mlrd so‘m — jismoniy shaxslarga;
- 5 foiz yoki 53 mlrd so‘m agregatorlarga;
- 11 foiz yoki 116,5 mlrd so‘m — Ridetech International B.V.