Olimxon Rustamov Qashqadaryo viloyati hokimining o‘rinbosari — viloyat investitsiyalar, sanoat va savdo boshqarmasi boshlig‘i lavozimiga tayinlandi. Bu haqda viloyat hokimligi axborot xizmati xabar berdi.
Olimxon Rustamov 1966-yil Toshkent shahrida tug‘ilgan. Toshkent xalq xo‘jaligi instituti, Lomonosov nomidagi Moskva davlat universiteti va O‘zbekiston prezidenti huzuridagi Davlat va jamiyat qurilishi akademiyasini tamomlagan.
Tayinlovga qadar investitsiyalar, sanoat va savdo vaziri o‘rinbosari lavozimida faoliyat yuritgan. Sentyabr oxirlarida u prezidentning tegishli farmoni bilan lavozimdan olingan edi.
Bundan avval Botir Ahmedov Buxoro viloyati hokimining moliya-iqtisodiyot va kambag‘allikni qisqartirish masalalari bo‘yicha birinchi o‘rinbosari etib tayinlangandi. Shuningdek, Habib Sirojiddinov Farg‘ona viloyati hokimining moliya-iqtisodiyot va kambag‘allikni qisqartirish masalalari bo‘yicha birinchi o‘rinbosari etib tayinlangani to‘g‘risida xabar berilgan edi.
Izoh (0)