Buxoro viloyati hokimiga yangi o‘rinbosarlar tayinlandi. Bu haqda viloyat hokimligi matbuot xizmati xabar berdi.
Jalol Arashov Buxoro viloyati hokimining qurilish, kommunikatsiyalar, kommunal xo‘jalik, ekologiya va ko‘kalamzorlashtirish masalalari bo‘yicha o‘rinbosari etib tayinlandi.
Tayinlovga qadar u 2022-yil iyunidan buyon Qurilish va uy-joy kommunal xo‘jaligi vaziri o‘rinbosari vazifasida ishlab kelayotgan edi. Undan avval Toshkent shahar qurilish bosh boshqarmasiga rahbarlik qilgan.
Jalol Arashov 1988-yilda Qorako‘l tumanida tug‘ilgan. 2009-yilda Toshkent arxitektura va qurilish institutini tugatgan.
Botirjon Shaxriyorov Buxoro viloyati hokimining turizm, madaniyat, madaniy meros va ommaviy kommunikatsiyalar masalalari bo‘yicha o‘rinbosari lavozimiga tayinlandi.
U 2022-yil aprelidan turizm va madaniy meros vazirining ommaviy tadbirlar va madaniy meros masalalari bo‘yicha o‘rinbosari lavozimida faoliyat yuritgan va 2023-yilning yanvarida ushbu lavozimdan ozod qilingan. Undan avval esa 2021-yilning 5-mayidan Buxoro viloyati hokimining turizm, sport, madaniyat, madaniy meros va ommaviy kommunikatsiyalar masalalari bo‘yicha o‘rinbosari — Turizm va sport bosh boshqarmasi boshlig‘i lavozimida ishlagan.
Bundan avval Botir Ahmedov Buxoro viloyati hokimining moliya-iqtisodiyot va kambag‘allikni qisqartirish masalalari bo‘yicha birinchi o‘rinbosari etib tayinlangandi.
Izoh (0)