Farg‘ona viloyati hokimiga birinchi o‘rinbosar tayinlandi, deb xabar bermoqda O‘zA axborot xizmati.
Ma‘lum qilinishicha, Habib Sirojiddinov Farg‘ona viloyati hokimining moliya-iqtisodiyot va kambag‘allikni qisqartirish masalalari bo‘yicha birinchi o‘rinbosari etib tayinlandi. Tayinlovga qadar Habib Sirojiddinov Davlat aktivlarini boshqarish agentligi Farg‘ona viloyati hududiy boshqarmasi boshlig‘i lavozimida ishlagan.
Bundan avval Qo‘qon shahrida prezident Shavkat Mirziyoyev raisligida yig‘ilish bo‘lib o‘tgan edi. Unda prezident to‘g‘ridan to‘g‘ri xorijiy investitsiya jalb qilish bo‘yicha Farg‘ona viloyatidagi ayrim tuman va shaharlarning ko‘rsatkichlari qoniqarsizligini ko‘rsatib o‘tdi, sanoat hajmi bo‘yicha respublikada 12-o‘ringa tushib qolgani tanqid qilindi, qator hokimlar va boshqarma boshliqlari lavozimidan ozod qilindi, tumanlarning barchasi yil yakunigacha 100 mln dollardan investitsiya jalb qilishi mumkinligi aytildi, Quvada loyihalar ishga tushishi natijasida 10 mingdan ziyod ish o‘rni yaratish mumkinligi va bu loyihalar hisobiga xorijdagi 6 ming nafar migrantimizni qaytib kelishi uchun muhit yaratilishi qayd etildi.
Shuningdek, davlat rahbari viloyatda jinoyatchilik va huquqbuzarliklarga qarshi kurashish masalasiga alohida to‘xtalib, bu boradagi ishlar ahvoli qoniqarsizligini tanqid qildi. Faoliyatida yo‘l qo‘ygan kamchiliklar uchun Farg‘ona viloyati ichki ishlar boshqarmasi boshlig‘i M.Jo‘rayev lavozimidan ozod etildi.
Izoh (0)