Qashqadaryo viloyatining G‘uzor tumani Soliq inspeksiyasi boshlig‘i tadbirkorga tegishli choyxonada noqonuniy tekshiruv o‘tkazgani bois jarimaga tortildi. Bu haqda “Daryo”ga biznes-ombudsmanning Qashqadaryo viloyatidagi vakili Sheroz Shodiyev xabar berdi.
Ma’lum bo‘lishicha, tumandagi “Ezgu niyat” MCHJga qarashli umumiy ovqatlanish shoxobchasida (tadbirkorlik subyektining nomi o‘zgartirilgan) G‘uzor tumani soliq inspeksiyasi boshlig‘i S.B.ning 2023-yil 21-fevraldagi buyrug‘iga asosan noqonuniy tekshiruv o‘tkazilgan. Shundan so‘ng, tadbirkor soliq organi xodimlariga qonuniy chora ko‘rishni so‘rab biznes-ombudsman devoni Qashqadaryo viloyati sho‘basiga murojaat qilgan.
Viloyat sho‘basi tomonidan tadbirkorlik subyektida noqonuniy tekshirish tashabbusi bilan chiqqan G‘uzor tumani soliq inspeksiyasi boshlig‘i S.B. 12 million so‘m miqdorda ma’muriy javobgarlikka tortilgan. Ish hujjatlarida G‘uzor tumani DSI boshlig‘i S.B.ning aybdor ekanligini tasdiqlovchi dalillar mavjud bo‘lsa-da, Jinoyat ishlari bo‘yicha G‘uzor tuman sudi tomonidan S.B.ga nisbatan jarima qo‘llash to‘g‘risidagi qarori asossiz bekor qilingan.
Mazkur sud qarori yuzasidan Qashqadaryo viloyati sudiga appelyatsiya shikoyati kiritdik. Qashqadaryo viloyati sudining 2022-yil 22-sentyabrdagi qarori bilan birinchi instansiya sudining qarori to‘liq bekor qilinib, G‘uzor tumani soliq inspeksiyasi boshlig‘i S.B.ning javobgarlikka tortilishi ta’minlandi, — deydi Sheroz Shodiyev.
Qo‘shimcha qilinishicha, mazkur ish 2023-yilning 22-sentyabr kuni Qashqadaryo viloyat sudi Jinoyat ishlari bo‘yicha sudlov hay’ati appelyatsiya instansiyasida ko‘rib chiqilgan.
Sud hujjatlarida qayd etilishicha, appelyatsiya instansiyasi Jinoyat ishlari bo‘yicha G‘uzor tuman sudining 2023-yil 3-avgustdagi S.B.ga nisbatan chiqarilgan qarorini bekor qilgan. Hamda tadbirkorlik subyektlarining huquqlari va qonuniy manfaatlarini himoya qilish bo‘yicha Qashqadaryo viloyatida faoliyat ko‘rsatuvchi vakili bosh inspektori Sheroz Shodiyevning 2023-yil 16-maydagi S.B.ga nisbatan chiqarilgan qarori o‘zgartirilib, mansabdor Ma’muriy javobgarlik to‘g‘risidagi kodeksning 241-2-moddasi bilan aybdor deb topilib, bazaviy hisoblash miqdorining 5 baravari miqdorida jarimaga tortilgan.
Izoh (0)