Qashqadaryo viloyatining Mirishkor tumanidagi MCHJ faoliyatini noqonuniy tekshirib, jamiyat direktori va hisobchisining jinoiy javobgarligiga sabab bo‘lgan taftishchi 12 million so‘m jarima to‘ladi. Bu haqda “Daryo”ga Biznes ombudsmanning Qashqadaryo viloyatidagi vakili Sheroz Shodiyev xabar berdi.
Ma’lum qilinishicha, Mirishkor tumanida faoliyat yurituvchi MCHJ viloyat Davlat moliyaviy nazorat boshqarmasi mansabdor shaxsi tomonidan tekshirilgan. Tekshirish yakuni bo‘yicha ma’lumotnoma rasmiylashtirilgan.
“Ushbu tekshirish natijasi bo‘yicha 2021-yil 6-sentabr kuni MCHJ rahbari va uning bosh hisobchisiga nisbatan jinoyat ishi qo‘zg‘atilgan. Jinoyat ishi doirasida MCHJ rahbari va bosh hisobchisi Jinoyat kodeksining 192-11-moddasi (nodavlat tijorat tashkilotida yoki boshqa nodavlat tashkilotida mansabdor shaxslar tomonidan o‘z vakolatlarini suiiste’mol qilish) bilan ayblanib, jinoiy javobgarlikka tortilgan.
Holat o‘rganilganda taftishchi o‘tkazgan o‘rganish vakolatli organ bilan kelishilmagan holda o‘tkazilgan bo‘lib, tekshiruvlarni elektron ro‘yxatga olish yagona tizimiga kiritilmagan. Shuningdek, MCHJ faoliyatida tekshirishni amalga oshirgan mansabdor shaxs tekshirish huquqini beruvchi maxsus guvohnoma ega bo‘lmagan”, — deydi Sheroz Shodiyev.
Aniqlanishicha, “Xo‘jalik yurituvchi subyektlar faoliyatini davlat tomonidan nazorat qilish to‘g‘risida”gi qonunning 6-moddasida tekshiruvchi mansabdor shaxslarga talablar belgilangan bo‘lib, tekshiruvchi xo‘jalik yurituvchi subyektlar faoliyatini tekshirishga ruxsat berilganligi to‘g‘risida maxsus guvohnomaga ega bo‘lishi lozim. “Tadbirkorlik faoliyati erkinligining kafolatlari to‘g‘risida” qonunning 39-moddasiga muvofiq tadbirkorlik subyektlari faoliyatining nazorat qiluvchi organlar tomonidan o‘tkaziladigan barcha tekshiruvlari Tekshiruvlarni elektron ro‘yxatga olish yagona tizimida ro‘yxatga olinishi shart.
“Apellyatsiya instansiya tomonidan MCHJga nisbatan 2021-yil 3-avgustda o‘tkazilgan tekshirish yuzasidan rasmiylashtirilgan ma’lumotnoma maqbul emas deb topilib, MCHJ rahbari va bosh hisobchisiga nisbatan jinoyat ishi tugatildi. Shuningdek, Biznes-ombudsman devoni xodimlari tomonidan ma’muriy bayonnoma asosida MCHJda noqonuniy tekshirish o‘tkazgan Qashqadaryo viloyat Davlat moliyaviy nazorat boshqarmasi mas’ul xodimi bazaviy hisoblash miqdorining 40 baravari miqdorida jarimaga tortildi”, — deydi Biznes-ombudsmanning Qashqadaryo viloyatidagi vakili.
Izoh (0)