Ekologik partiyasi fraksiyasining navbatdagi yig‘ilishida “Davlat xizmatlari ko‘rsatish tizimi takomillashtirilganligi munosabati bilan O‘zbekiston Respublikasining ayrim qonun hujjatlariga o‘zgartirish va qo‘shimchalar kiritish to‘g‘risida”gi qonun loyihasi muhokama qilindi.
“O‘zbekiston – 2030” strategiyasida ham davlat xizmatlarini raqamlashtirishning ko‘lamini kengaytirish orqali aholi uchun “Servis davlat” tizimini joriy qilish, fuqaro va davlat o‘rtasidagi munosabatlarda byurokratik tartibotlarga barham berish borasida ustuvor maqsad va vazifalar belgilangan.
Bu borada elektron shaklda ko‘rsatiladigan davlat xizmatlari ulushini 100 foizgacha, faqat Yagona interaktiv davlat xizmatlari portali orqali ko‘rsatiladigan xizmatlar ulushini 50 foizgacha yetkazish, shuningdek kompozit va proaktiv tarzda ko‘rsatiladigan davlat xizmatlari ulushini kamida 40 taga oshirish ko‘zda tutilgan.
Ko‘rib chiqilgan qonun loyihasi bilan davlat xizmatlari ko‘rsatish tizimini takomillashtirish, jumladan, diplom, litsenziya, ruxsatnoma, davlat boji, yig‘imlar va boshqa to‘lovlar to‘langanini tasdiqlovchi hujjatlar kabi 15 ta faktlarni tasdiqlovchi maʼlumot va hujjatlar talab qilishni bekor qilish belgilanmoqda.
Muhokamalar davomida qonun loyihasini yanada takomillashtirish yuzasidan tegishli taklif va tavsiyalar berilgan hamda qo‘llab-quvvatlangan.
Davlat xizmatlarini ko‘rsatishdagi qulayliklar
So‘nggi yillarda davlat xizmatlarini ko‘rsatish jarayonida 73 turdagi hujjat va maʼlumotnomalarning aholidan talab qilinishi bekor qilindi. Shuningdek, 200 dan ortiq tartib-taomillar soddalashtirildi.
Davlat xizmatlarini ko‘rsatishda talab etiladigan hujjatlar soni 221 tadan 95 taga – 43 foizga qisqartirilgan. Birgina 73 turdagi hujjatlarning qisqartirilishi natijasida yiliga o‘rtacha 20 million aholiga qulaylik yaratildi. Ularning 300 milliard so‘mdan ortiq mablag‘i cho‘ntagida qoldi.
Izoh (0)