Amazonkada qurg‘oqchilik va daryodagi suv harorati rekord darajaga yetgani sababli yuzdan ortiq delfinlar nobud bo‘ldi. Bu haqda CNN xabar berdi.
Mamiraua instituti (Braziliya Fan vazirligi tomonidan asos solingan va moliyalashtirilgan) xabar berishicha, so‘nggi yetti kun ichida Tefe ko‘lida o‘lik delfinlar topilgan.
“Ushbu ekstremal hodisa sabablarini aniqlashga hali erta, biroq mutaxassislarimiz buni Tefe ko‘lidagi qurg‘oqchilik davri va yuqori harorat bilan bog‘liq deb hisoblamoqda, ba’zi nuqtalarda harorat 39 darajadan oshib ketgan”, — deyiladi bayonotda.
Mamiraua institutidan Ayan Fleyshman The Guardian nashriga aniqlik kiritishicha, suv sathi va harorat delfinlarning ommaviy nobud bo‘lishida “albatta asosiy omillar”dir. Shu bilan birga, u boshqa sabablar qatorida kasallik va kanalizatsiya bilan ifloslanish versiyalari o‘rganilayotganini aytdi.
Olimlar va faollar omon qolgan delfinlarni Amazonning suvi salqinroq bo‘lgan qismiga ko‘chirish orqali ularni saqlab qolishga harakat qilmoqda, biroq hudud uzoqligi sababli bunday operatsiyalarni amalga oshirish qiyin.
Amazoniya delfinlari, ba’zan rangi tufayli pushti delfinlar deb ataladi. Ularning diapazoni butun Amazon va uning irmoqlarini qamrab oladi. Bu delfinlar yo‘qolib ketish xavfi ostida bo‘lgan turlardir.
“Hududda uzoq davom etgan qurg‘oqchilik nafaqat u yerda yashovchi turlarga, balki iqtisodiyotga ham o‘z ta’sirini o‘tkazmoqda” — dedi CNN.
Amazonas shtatidagi (Braziliya) 59 ta munitsipalitetda suv sathi o‘rtacha darajadan pastga tushib, transport va baliqchilik faoliyatiga to‘sqinlik qilmoqda. Ayniqsa, 70 ming kishi istiqomat qiluvchi Tefe munitsipaliteti qurg‘oqchilikdan ko‘proq jabr ko‘rdi.
Izoh (0)