Экстремал ҳодиса: Бразилияда юқори ҳарорат сабабли юзлаб дельфинлар нобуд бўлди

Амазонкада қурғоқчилик ва дарёдаги сув ҳарорати рекорд даражага етгани сабабли юздан ортиқ дельфинлар нобуд бўлди. Бу ҳақда CNN хабар берди.

Мамирауа институти (Бразилия Фан вазирлиги томонидан асос солинган ва молиялаштирилган) хабар беришича, сўнгги етти кун ичида Тефе кўлида ўлик дельфинлар топилган.

 “Ушбу экстремал ҳодиса сабабларини аниқлашга ҳали эрта, бироқ мутахассисларимиз буни Тефе кўлидаги қурғоқчилик даври ва юқори ҳарорат билан боғлиқ деб ҳисобламоқда, баъзи нуқталарда ҳарорат 39 даражадан ошиб кетган”, — дейилади баёнотда.

Мамирауа институтидан Аян Флейшман Тhе Guardian нашрига аниқлик киритишича, сув сатҳи ва ҳарорат дельфинларнинг оммавий нобуд бўлишида “албатта асосий омиллар”дир. Шу билан бирга, у бошқа сабаблар қаторида касаллик ва канализация билан ифлосланиш версиялари ўрганилаётганини айтди.

Олимлар ва фаоллар омон қолган дельфинларни Амазоннинг суви салқинроқ бўлган қисмига кўчириш орқали уларни сақлаб қолишга ҳаракат қилмоқда, бироқ ҳудуд узоқлиги сабабли бундай операцияларни амалга ошириш қийин.

Амазония дельфинлари, баъзан ранги туфайли пушти дельфинлар деб аталади. Уларнинг диапазони бутун Амазон ва унинг ирмоқларини қамраб олади. Бу дельфинлар йўқолиб кетиш хавфи остида бўлган турлардир.

“Ҳудудда узоқ давом этган қурғоқчилик нафақат у ерда яшовчи турларга, балки иқтисодиётга ҳам ўз таъсирини ўтказмоқда” — деди CNN. 

Амазонас штатидаги (Бразилия) 59 та муниципалитетда сув сатҳи ўртача даражадан пастга тушиб, транспорт ва балиқчилик фаолиятига тўсқинлик қилмоқда. Айниқса, 70 минг киши истиқомат қилувчи Тефе муниципалитети қурғоқчиликдан кўпроқ жабр кўрди.