Ijtimoiy tarmoqlarda Chevrolet Captiva-2024 avtomobillarining narxlari haqida maʼlumotlar tarqaldi. UzAutoMotors tarmoqlarda tarqalgan xabarga munosabat bildirdi.

Unga ko‘ra, tarqalgan maʼlumotlar soxta. Saytdan olingan skrinshotlarda Chevrolet Tracker avtomobil rasmi va narxlari ko‘rsatilganiga eʼtibor bermagan holda, kanallar soxta xabarlarni tarqatishda davom etmoqda. UzAutoMotors kompaniyasi ijtimoiy tarmoqlarda tarqatilgan avtomobil haqidagi maʼlumotlar narxi va komplektatsiyasiga ko‘ra Chevrolet Tracker avtomobiliga to‘g‘ri kelishi va Captivaʼga hech qanday aloqasi yo‘qligini maʼlum qildi.

“Bundan tashqari, Chevrolet Captiva faqat 3 ta komplektatsiyada sotuvga chiqariladi. Hurmatli kanal adminlari va blogerlar, xabarni “sensatsiya” qilishdan oldin kompaniyaning rasmiy kanallarida berilgan maʼlumotlarni diqqat bilan solishtirishingizni so‘raymiz”, — deyiladi xabarda.

Maʼlumot uchun, Captiva modeli O‘zbekiston bozoriga 2007-yilda kirib kelgan. O‘sha yilning oktabrida mamlakatda avtomobilni yig‘ish yo‘lga qo‘yilgan. 2011-yilning sentabri va 2017-yilning fevralida model yangilangan. 2018-yilning sentabrida esa GM’ning global strategiyasiga muvofiq uni ishlab chiqarish to‘xtatilgan.