Captiva o‘zbek avtomobil ixlosmandlari uchun yaxshigina tanish. Mazkur avto tashqi ko‘rinishi va haydovchi uchun o‘ziga xos qulayliklari bilan ajralib turadi.
Besh yildan buyon sotuvda bo‘lmagan Captiva’ning yangilangan modeli oktabr oyi yakunida sotuvga chiqarilishi mumkinligi haqida bayonot berildi. “Daryo” nashri Captiva’ning mamlakatda ishlab chiqarish tarixi, u bilan bog‘liq muhim voqeyliklarni jamladi.
11 yillik umr
Dastlab Captiva modeli O‘zbekiston bozoriga 2007-yilda kirib kelgan va o‘sha yilning o‘zida mamlakatda avtomobilni yig‘ish yo‘lga qo‘yilgandi. To 2017-yilga qadar bir necha modelda ishlab chiqarilgan va uni yig‘ish 2018-yilda to‘xtatilgandi.
Oradan uch yil o‘tib yangilangan Captiva O‘zbekiston avtomobil bozoriga qaytishga urindi.
Birinchi urinish
UzAuto Motors bundan ikki yil muqaddam, 2021-yilning kuzida yangilangan Captiva krossoverini taqdim etgandi. O‘shanda avtomobilning 4 turdagi komplektatsiyasi: 192 million so‘mdan to 269 million so‘mgacha bo‘lgandi va shartnoma berila boshlangan.
Avtomobil 1,5 litrli turbo dvigatel, 10,4 dyuymli sensorli ekran, avtomatik uzatmalar qutisi, elektr boshqaruvli rul bilan jihozlangan, o‘rindiqlar soft touch materiali bilan qoplangan.
Bittasi qaysar chiqdi
Oradan ikki oy o‘tib, noyabr oyi o‘rtalarida xaridorlarga qariyb 500 ga yaqin shartnoma berilganidan keyin tarmoqlarda Captiva-5 avtomobili uchun to‘lov qilgan xaridorlar avtosalonlar va UzAuto Motors mas’ullari bilan bog‘lanib, ularga mashina go‘yoki “mintaqamizga to‘g‘ri kelmagani uchun” yetkazib berilmasligi, to‘lovni yo butunligicha qaytarib olish yoki boshqa model xaridi uchun yo‘naltirish tavsiya etilayotgani haqida xabarlar tarqaldi.
Bunga UzAuto Motors Captiva-5 bo‘yicha shartnomalar tuzishni to‘xtatishga “majbur bo‘layotgani”ni e’lon qildi. Oldindan to‘lov qilganlarga summaning 5 foizi miqdorida kompensatsiya puli berilishini bildirgan. Avtoning to‘xtatilish sababi sifatida jahon bozorida yarimo‘tkazgich mikrochiplar yetishmayotgani keltirilgan.
O‘sha 500 ga yaqin shartnoma egalaridan qaysi biridir pulini kompensatsiya bilan qaytarib olgan bo‘lsa, yana kimdir zavoddan boshqa mashina berishlariga rozi bo‘ldi. Lekin ularning ichidan bittasi qaysar chiqdi, oxirigacha bordi – sudlashdi.
17 oy davom etgan sud
Captiva-5 ga pul to‘lab ololmaganlardan biri – O‘ktam Qahhorov avtomobilini yetkazib berilmasligiga sabab sifatida aytilgan “O‘zbekiston iqlimiga to‘g‘ri kelmasligi” haqidagi vajni tan olmadi va sudga murojaat qildi.
Sud ishi 17 oy davom etdi. UzAuto Motors bir necha marta sudda yutqazdi. Hatto bosh prokuror o‘rinbosari Svetlana Ortiqova Oliy sudga takroriy kassatsiya tartibida ko‘rib chiqish UzAuto Motors’ning yonini olib, protest kiritdi.
Yillab davom etgan sud ishi 2023-yilning may oyiga kelib yakunlandi. Oliy sud O‘ktam Qahhorov foydasiga qaror chiqarib, kompaniyaga Captiva-5 ni isteʼmolchiga yetkazib berish majburiyatini yukladi.
Ikkinchi urinish
Birinchi urinishdan ikki yil o‘tib ayni kuz boshida “O‘zavtosanoat” Captiva-5 oktabr oyi yakunida sotuvga chiqarilishi mumkinligini maʼlum qildi. Aytilishicha, avtomobil agar test jarayonidan muvaffaqiyatli o‘tsa, bozorga qo‘yiladi. Mashinalar Xitoydan olib kelib, yetkazib beriladi.
Mas’ullar avval O‘zbekiston iqlimiga to‘g‘ri kelmasligi daʼvo qilingan Captiva-5 yana qanday qilib ob-havoga moslashgani yoki maslashtirilgani yuzasidan izoh berilmagan.
Kompaniya Captiva-5 narxi sotuv boshlanishidan avval e’lon qilinganini aytgan. Lekin uni O‘zbekiston avtomobil bozorlaridan topish mumkin. Internet do‘konlarda Captiva-5 sotmoqchi yoki yangisini chetdan olib kelib berishi haqida eʼlonlar turibdi. Ularda Captiva-5 narxi 33-35 ming dollar atrofida taklif qilinmoqda.
Izoh (0)