Ижтимоий тармоқларда Chevrolet Captiva-2024 автомобилларининг нархлари ҳақида маълумотлар тарқалди. UzAutoMotors тармоқларда тарқалган хабарга муносабат билдирди.
Унга кўра, тарқалган маълумотлар сохта. Сайтдан олинган скриншотларда Chevrolet Tracker автомобиль расми ва нархлари кўрсатилганига эътибор бермаган ҳолда, каналлар сохта хабарларни тарқатишда давом этмоқда. UzAutoMotors компанияси ижтимоий тармоқларда тарқатилган автомобиль ҳақидаги маълумотлар нархи ва комплектациясига кўра Chevrolet Tracker автомобилига тўғри келиши ва Captiva'га ҳеч қандай алоқаси йўқлигини маълум қилди.
“Бундан ташқари, Chevrolet Captiva фақат 3 та комплектацияда сотувга чиқарилади. Ҳурматли канал админлари ва блогерлар, хабарни “сенсация” қилишдан олдин компаниянинг расмий каналларида берилган маълумотларни диққат билан солиштиришингизни сўраймиз”, — дейилади хабарда.
Маълумот учун, Captiva модели Ўзбекистон бозорига 2007 йилда кириб келган. Ўша йилнинг октябрида мамлакатда автомобилни йиғиш йўлга қўйилган. 2011 йилнинг сентябри ва 2017 йилнинг февралида модел янгиланган. 2018 йилнинг сентябрида эса GM'нинг глобал стратегиясига мувофиқ уни ишлаб чиқариш тўхтатилган.