Ўзбек томошабинларининг севимли фильмлари қаторидан жой олган “Бобби” фильмининг финал саҳнасида ёш Димпл Кападиянинг қўлларидаги никоҳ хинасини яширишнинг иложи бўлмаган. Раж Капурнинг блокбастери экран юзига чиқишидан аввалроқ бош қаҳрамонни гавдалантирган ўсмир қизалоқ, ўзидан 16 ёш катта бўлган Ражеш Кҳаннага турмушга чиқиб улгурган эди.
Эрта карьера ва эрта турмуш
Димпл Кападия 1957 йил 8 июнда Бомбейда дунёга келган. Туғилганида Амина деб исм қўйилганига қарамай, юзида кулгичи борлиги сабаб қизалоқни Димпл деб чақиришган. У оилада 4 нафар фарзанднинг тўнғичи бўлган. Димпл Раж Капурнинг “Бобби” (1973) фильмида суратга тушиш учун тасдиқланган. Унинг Ражеш Кҳанна билан самолётдаги парвоз вақтида танишгани айтилади. Ясир Усманнинг “Ражеш Кҳанна: Ҳиндистоннинг энг катта суперюлдузи” китобида ёзилишича, актёр Димплни бир кўришдаёқ севиб қолган. Бир неча йил учрашиб юрган қайлиғи Анжу Махендра билан муносабатларига чек қўйган Ражеш 15 ёшли қиз билан ҳаётини боғлашни афзал билган. Турмуш қурганларидан 6 ой ўтиб, “Бобби” экран юзини кўрган ва Димпл энг яхши актриса сифатида Filmfare Awardъ’ни қўлга киритган.
Ўзлигини йўқотишдан қўрққан актриса
Димпл оилали бўлганидан кейин аввалгидек эрки ўзига боғлиқ бўлмай қолган. Замонавий калта либослар ўрнига шифон матосидан тикилган сари кия бошлаган. Кайфияти ва ўзини тутиши ҳам қизлик вақтидагидан фарқ қила бошлаган. Кўп ўтмай ёшида сезиларли фарқ бўлган жуфтлик муносабатларида дарз кетиш кузатилган. Ражешнинг машҳурликни қўлдан бой бериб, спиртли ичимликларга ружу қўйгани, шунингдек, қўпол муносабатда бўлиши ҳали ёш ва беғубор бўлган Димплга оғир ботган. Актриса 1982 йилда 8 ва 4 ёшли қизлари Твинкл ва Ринка билан уйдан чиқиб кетган.
“Биз Ражеш билан узоқ вақт давомида турмушимизнинг барбод бўлганига кўника олмадик. Аммо мен у билан қанча узоқ қолсам, ўзлигимни шунча кўп йўқотишимни тушуниб етдим. Мен унинг табассумини кўриш учун ҳамма нарса қилишга тайёр эдим”, — деган у India Today нашрига берган интервьюсида. 10 йиллик турмушидан кейин бир олам ҳаётий тажриба билан кинооламига қайта қадам ташлаган Димпл “Ишонч” (1985), “Кибр” (1993) ҳамда “Чорасизлик” (1993) сингари фильмларда муваффақиятли ролларни ижро қилган.
Димпл ўхшамаган турмуши, икки нафар синглиси ва укасининг вафотидан сабоқ олиб улгурган эди. “Ҳаётимнинг бутун ҳикояси юзимда ўз аксини топган. Унда беғуборлик ҳам, сиполик ҳам йўқ. Ундан кўп нарсани билиш мумкин”, — деган у India Today’га берган интервьюсида. Режиссёр Мринал Сен уни Софи Лорен билан солиштириб, юзини “ҳувуллаган манзара”га ўхшатганда Фероз Хон: “Ҳеч бир бошқа қизда бу қадар агрессия намоён эмас”, — деган. Ҳатто сочидаги эрта оралаган оқлар ҳам бошидан кечирган даврларидан мағрурона эслатмадек эди гўё.
Иккинчи уриниш
Димпл катта экранларга “Севги денгизи” (1984) фильмидаги роли билан қайтган. 1985 йилда премьераси бўлган фильмдан кейин Димлп Filmfare мукофотига энг яхши актриса сифатида лойиқ деб топилган. Махеш Бхаттнинг “Кошки”(1987) номли фильми актрисага ҳақиқий машҳурлик келтирган. “Мен Димплни у гавдалантирган қаҳрамон Пужидан фарқлай олмайман. У ҳаётида кўп нарсаларни бошдан ўтказган”, — деган фильм режиссёри Бхатт.
“Кибр” (1993) фильмидаги ижроси ортидан эса Миллий мукофотни қўлга киритган. 2020 йилда актриса Кристофер Ноланнинг “Далил” номли триллерида ҳам суратга тушган. “Бу ўзимга ишонишга мажбур қилди”, — дейди у. 2021 йилда эса Али Аббос Зафарнинг “Тандав” деб номланган сериалида иштирок этган. Келажакдаги лойиҳалари орасида Аян Мукержининг “Braxmastra” фентезиси ҳамда Динеш Вижаннинг ҳали номи маълум бўлмаган комедияси бор.
Яхши рафиқа
Вақт ўтиши билан Димпл ва Ражешнинг муносабатлари изига туша бошлаган. Хафагарчилик ва гинанинг ўрнини ўзаро ҳурмат эгаллай бошлаган. Ундан нима учун иккинчи марта турмушга чиқмаслиги ҳақида сўралганда: “Мен жуда ҳам бахтлиман ва ҳаётимдан мамнунман. Қайта турмуш қуришнинг нима кераги бор? Бир мартаси шундоқ ҳам етарли бўлган”,— деган.
Изоҳ (0)