Jahon iqtisodiyoti va diplomatiya universitetiga maksimal ball to‘plagan, ammo kontrakt asosida o‘qishga kirgan 5 nafar abituriyent prezident imtiyozi asosida grantda o‘qiydigan bo‘ldi.
Bosh vazir matbuot kotibi Bekzod Hidoyatovning ma’lum qilishicha, Shavkat Mirziyoyev topshiriqlariga asosan ta’lim tashkilotlariga qabul qilish bo‘yicha Davlat komissiyasining navbatdagi bayoni qabul qilindi.
Unga ko‘ra, Jahon iqtisodiyoti va diplomatiya universitetining Xalqaro munosabatlar yo‘nalishi (o‘zbek guruhi)ga eng yuqori — 189 ball to‘plagan ammo to‘lov-kontrakt asosida tavsiya etilgan quyidagi abituriyentlar:
- Axatova Aziza Shuxrat qizi;
- Abdulvoxidova Muxayyoxon Lutfullo qizi;
- Xo‘jabekov Ubaydullo Ne’matovich;
- Irgasheva Muxlisa Azizbek qizi;
- Tilavoldiyev Sanjar Zafarjon o‘g‘li prezident tomonidan berilgan imtiyoz bo‘yicha davlat granti asosida o‘qiydi.
Eslatib o‘tamiz, OTMlarga kirish imtihoni natijalari eʼlon qilingach, maksimal ball to‘plab ham kontrakt asosida o‘qishga kirgan abituriyentlar mavzusi va “Temurbeklar maktabi” bitiruvchilariga berilgan imtiyoz jamoatchilik e’tirozlariga sabab bo‘lgandi. Xususan, huquqshunos bloger Xushnudbek Xudoyberdiyev imtihon natijalariga imtiyozli ball qo‘shmaslik kerakligi va “Temurbeklar maktabi” bitiruvchilariga imtiyoz berilgan taqdirda ham, faqat harbiy OTMlar uchun berilishi lozimligini qayd etgandi.
Bilim va malakalarni baholash agentligi rahbari Majid Karimov bu masala davlat komissiyasi tomonidan ko‘rib chiqilishini aytgandi.
“189 ball olgan abituriyentlar soni 61 ta bo‘ldi. Bundan tashqari, ‘Temurbeklar maktabi’ bitiruvchilariga OTMga kirishda 15 foiz qo‘shib beriladi. Shu sababli ularning balli 189 balldan yuqori bo‘ldi. Kimga imtiyoz beriladi, kimga alohida kvota beriladi... Bularning vakolati Bilimni baholash agentligida ham emas, Oliy taʼlim vazirligi vakolatida ham emas. Birinchi navbatda taʼlim muassasalariga qabul qilish davlat komissiyasi bor. Bu ana shu komissiya vakolatidagi vazifa”, — degan edi u kirish test sinovlari yakunlari bo‘yicha o‘tkazilgan matbuot anjumanida.
Oliy taʼlim, fan va innovatsiyalar vazirligining qabul jarayonlarini tashkil etish bo‘limi boshlig‘i Abdusamat Mamanazarov har yili eng yuqori natija qayd etgan 200 nafar abituriyentga prezident granti berilishini, bu bo‘yicha tahlillar olib borilayotganini ma’lum qilgandi.
Izoh (0)