O‘zbekiston prezidentining AQSHga amaliy tashrifi tadbirlarga g‘oyat boy dasturi yakuniga yetib, davlat rahbari 21-sentabr kuni Toshkentga qaytib keldi.
Shavkat Mirziyoyev Nyu-York shahrida BMT Bosh Assambleyasi 78-sessiyasining umumsiyosiy munozaralarida nutq so‘zlab, O‘zbekistonda amalga oshirilayotgan keng ko‘lamli islohotlarga alohida to‘xtaldi hamda global va mintaqaviy kun tartibining eng dolzarb masalalari yechimiga qaratilgan qator tashabbuslarni ilgari surdi.
Markaziy Osiyo mamlakatlari va AQSH yetakchilarining “C5+1” formatidagi birinchi sammiti bo‘lib o‘tdi. Shavkat Mirziyoyev va AQSH prezidenti Jozef Bayden ikki tomonlama uchrashuvda davlatlararo va mintaqaviy hamkorlikning dolzarb masalalarini ko‘rib chiqdi.
Bundan tashqari, davlat rahbari Yevropa kengashi prezidenti Sharl Mishel, Koreya prezidenti Yun Sok Yol, Pokiston bosh vaziri vazifasini bajaruvchi Anvar Kakar, shuningdek, nufuzli xalqaro tuzilmalar rahbarlari — BMT Bosh kotibi Antoniu Guterrish, Xalqaro valyuta fondi boshqaruvchi direktori Kristalina Georgiyeva, Jahon savdo tashkiloti bosh direktori Ngozi Okonjo-Iveala, Jahon banki guruhi prezidenti Adjay Banga, FIFA prezidenti Janni Infantino bilan muzokaralar o‘tkazdi.
Prezident matbuot xizmati xabarida ta’kidlanishicha, tashrifning ishbilarmonlik dasturi ham voqealarga boy bo‘ldi. O‘zbekiston yetakchisi AQSH biznesi vakillarining O‘zbekiston—Amerika savdo palatasi raisi Kerolin Lemm boshchiligidagi delegatsiyasi hamda yirik transmilliy kompaniya va korporatsiyalar — Air Products, Citigroup, SNH, Boston Consulting Group, GE HealthCare, Oppenheimer, Cerberus, Cintana rahbarlari bilan uchrashdi.
Tashrif dasturidagi tadbirlar yakunlangach, Shavkat Mirziyoyev Toshkentga qaytib keldi.
Izoh (0)