Samarqand viloyatida ehtiyot chorasini o‘zgartirib berish evaziga pul talab qilgan shaxs qo‘lga olindi, deb xabar beradi Bosh prokuratura huzuridagi departament.
Qayd etilishicha, departament hamda DXXning Past Darg‘om tumani bo‘limlari tomonidan tezkor tadbir o‘tkazilgan. Tadbirda A.O. ismli shaxs fuqaro M.Sh.ning ishonchiga kirib, uning turmush o‘rtog‘i A.U.ga nisbatan jinoyat ishi doirasida qo‘llangan qamoqqa olish ehtiyot chorasini tanishlari yordamida 10 ming dollar evaziga o‘zgartirib, qamoqdan chiqarib berishni vaʼda qilgani ma’lum bo‘lgan. A.O. kelishilgan puldan 5 ming dollarni olgan vaqtida ashyoviy dalillar bilan ushlangan.
Mazkur holat yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishi qo‘zg‘atilib, tergov harakatlari o‘tkazilmoqda.
Aprel oyida Navoiy viloyatida tergov ishlarini yengillashtirib berishini aytib, 100 million so‘m so‘ragan ayol jinoyati ustida qo‘lga tushgandi. Shuningdek, Samarqandda 2,5 milliard so‘mlik qazdorlikni kamaytirish uchun 15 ming dollar so‘ragan soliq inspektori qo‘lga olingan edi.
Izoh (0)